Donald Trump Said PM Modi Is My Friend: आपल्या वक्तव्यांनी आणि कृतींनी भारताशी संबंध बिघडवणारे डोनाल्ड ट्रम्प आता डॅमेज कंट्रोल करताना दिसत आहेत. त्यांनी भारताचे पंतप्रधान नरेंद्र मोदी त्यांचे खास मित्र असल्याचे म्हटले आहे. शुक्रवारी जेव्हा त्यांना भारत-अमेरिका संबंधांबद्दल विचारले गेले तेव्हा त्यांनी सांगितले की, ते नेहमीच पंतप्रधान नरेंद्र मोदींचे मित्र राहतील. याचबरोबर भारत-अमेरिकेतील संबंध खास असल्याचेही म्हटले. यावेळी त्यांनी असेही म्हटले की दोन्ही देशांमधील संबंधांमध्ये काळजी करण्यासारखे काहीही नाही. पण, ट्रम्प यांनी पंतप्रधान मोदींच्या सध्याच्या काही धोरणांशीही असहमती व्यक्त केली आहे.
वृत्तसंस्था एएनआयशी बोलताना ट्रम्प म्हणाले, “मी नेहमीच पंतप्रधान मोदींचा मित्र राहीन. ते एक महान पंतप्रधान आहेत. पण सध्या मला त्यांची काही धोरणे आवडत नाहीत. भारत आणि अमेरिकेचे संबंध खूप खास असले तरी काळजी करण्यासारखे काही नाही. कधीकधी असे क्षण येतात.”
दरम्यान डोनाल्ड ट्रम्प यांनी काल सोशल मीडियावर चीनचे राष्ट्राध्यक्ष शी जिनपिंग, रशियाचे राष्ट्राध्यक्ष व्लादिमीर पुतिन आणि पंतप्रधान नरेंद्र मोदी यांचा एक फोटो शेअर केला होता. यावेळे त्या फोटोला ट्रम्प यांनी, “असे दिसते की आपण भारत आणि रशियाला चीनसमोर गमावले आहे. त्यांचे एकत्र भविष्य दीर्घ आणि समृद्ध असो!”, असे कॅप्शन दिले होते.
ट्रम्प यांनी त्यांच्या या विधानावर स्पष्टीकरण दिले आहे. यावर ते म्हणाले, “मला वाटत नाही की असे काही घडले आहे. हो, भारत रशियाकडून इतके तेल खरेदी करत आहे याबद्दल मी निश्चितच निराश आहे. मी त्यांना हे स्पष्ट केले आहे. आम्ही भारतावर ५० टक्क्यांचा खूप मोठा टॅरिफ लादले आहे. पण तुम्हाला माहिती आहेच, माझे मोदींशी चांगले संबंध आहेत. ते काही महिन्यांपूर्वी येथे आले होते, आम्ही रोज गार्डनमध्ये एक संयुक्त पत्रकार परिषद देखील घेतली होती.”
ट्रम्प यांच्या विधानानंतर, भारताच्या परराष्ट्र मंत्रालयाचे प्रवक्ते रणधीर जयस्वाल म्हणाले, “भारत आणि अमेरिकेतील संबंध आमच्यासाठी खूप महत्वाचे आहेत. दोन्ही देशांची भागीदारी सामायिक हितसंबंध, लोकशाही मूल्ये आणि मजबूत जनसंपर्क यावर आधारित आहे. ही भागीदारी अनेक आव्हाने आणि बदलांमधून गेली आहे आणि अधिक मजबूत झाली आहे. आम्ही अशा ठोस मुद्द्यांवर लक्ष केंद्रित करत आहोत ज्यावर दोन्ही देश सहमत आहेत. आम्हाला आशा आहे की, हे संबंध परस्पर आदर आणि सामायिक हितसंबंधांवर पुढे जातील.” जयस्वाल यांनी यावेळी हे देखील स्पष्ट केले की भारत आणि अमेरिका यांच्यात व्यापार मुद्द्यांवर सतत संवाद सुरू आहे.
