एका महिला आयएएस अधिकाऱ्याने २० वर्षांपूर्वीची एका भूखंडावरची स्थगिती उठवली. त्यानंतर तातडीने तिच्या पतीने आणि मुलाने हा भूखंड खरेदी केला. हरियाणाच्या पंचकुला या ठिकाणी ही घटना घडली आहे. ही बाब लक्षात आल्यानंतर हरियाणाच्या महसूल विभागाच्या अधिकाऱ्यांनी कोट्यवधी रुपयांच्या या भूखंडाच्या व्यवहारात विसंगती आढळल्याने या भूखंड खरेदीची नोंदणी थांबवली आहे. काय आहे हे प्रकरण? इंडियन एक्स्प्रेसच्या वृत्तानुसार अंबालाच्या विभागीय आयुक्त रेणू फुलिया यांनी १३ सप्टेंबर २०२३ ला एक आदेश देत पंचकूलाच्या जवळ असलेल्या १४ एकर जमिनीवरची विक्री आणि खरेदीवरची २० वर्षांपासून असलेली स्थगिती उठवली. ही जमीन एका राजाची होती. पृथ्वीराज छाबडा यांनी या प्रकरणात याचिका दाखल केली होती. त्यानंतर अवघ्या १६ दिवसांत खरेदी-विक्रीची बंदी हटवण्यात आली. रेणू फुलिया यांच्या पतीने आणि मुलाने काय केलं? या सगळ्यानंतर काही महिन्यांच्या आत रेणू यांचे पती एसएस फुलिया आणि त्यांचा मुलगा नीलांचल यांनी या जागेतली पाच एकर जमीन खरेदी करण्याचा निर्णय घेतला. एसएस फुलिया या सध्या राज्याच्या माहिती आयुक्त आहेत. २०२२ ला त्यांना या पदावर नेमण्यात आलं. या प्रकरणी गुलाटी बंधूंनी सांगितलं की १२ एकर जमिनीच्या रजिस्ट्रेशनसाठी पंचकूला येथील महसूल विभागाच्या अधिकाऱ्यांनी संपर्क केला. गुलाई भावांनी हा दावा केला आहे की चार व्यक्तींना ही जमीन ५.२६ कोटी रुपयांना विकली होती. यातली पाच एकर जमीन फुलिया कुटुंबाने घेतली होती. तर उर्वरित जमीन मनीमाजराच्या रहिवासी आणि माजी भारतीय लष्कर अधिकाऱ्या पत्नी शुभम जुनेजा यांना विकली होती. रेकॉर्डमध्ये असलेल्या नोंदीनुसार शशी गुलाटी आणि त्यांच्या कुटुंबाने पंचकूला जिल्ह्यातील बीड फिरोजादी गावाचे दिवंगत राजांच्या कायदेशीर वारसांकडून ही जमीन घेतली होती. राजाच्या नावे बीड, बाबूपूर, बीड फिरोजादी, संगरना, बरवाला, जलोली, फतेहपूर वीरान या गावांमध्ये मिळून १३९६ एकर जमीन होती. इंडियन एक्स्प्रेसच्या वृत्तानुसार मागच्या २० वर्षांपासून या जमिनीच्या खरेदी-विक्री व्यवहारांवर स्थगिती लावण्यात आली होती. कारण अधिकाऱ्यांना हे माहीत होतं की Land Holding Act 1972 च्या अन्वये राजाच्या नावे असलेल्या जमिनीचा कुठला भाग सरप्लस कॅटेगरीत येतो.