G20 Summit in India: शी जिनपिंग यांच्या अनुपस्थितीवर जो बायडेन यांची प्रतिक्रिया, म्हणाले,”मी निराश आहे, पण…”

भारत आणि व्हिएतनाम देशांच्या दौऱ्यासाठी उत्सुक आहात का? असं विचारलं असता बायडेन म्हणाले, “होय, मी उत्सुक आहे.” दरम्यान, चीनचे राष्ट्राध्यक्ष शी जिनपिंग हे या परिषदेला उपस्थित राहणार नसल्याच्या वृत्तावर भाष्य करताना बायडेन म्हणाले, “मी निराश झालो आहे. पण मी त्यांना लवकरच भेटणार आहे.”

या वर्षाच्या अखेरीस सॅन फ्रान्सिस्को येथे आशिया-पॅसिफिक इकॉनॉमिक कोऑपरेशन फोरमची परिषद होणार आहे. या परिषदेत बायडेन आणि जिनपिंग यांची भेट होण्याची शक्यता आहे. व्हाईट हाऊसने दिलेल्या माहितीनुसार, बायडेन ७ सप्टेंबरला (गुरुवारी) भारतात येणार आहेत. ८ सप्टेंबर रोजी शिखर परिषदेच्या आधी पंतप्रधान नरेंद्र मोदी यांच्याबरोबर त्यांची द्विपक्षीय बैठक होणार आहे.

हेही वाचा- ‘एक देश-एक निवडणूक’ वाद: ‘संघराज्य व्यवस्थेसह राज्यांवरही हल्ला’

राजधानी दिल्लीत पार पडणाऱ्या जी-२० शिखर परिषदेला अमेरिकेचे राष्ट्राध्यक्ष जो बायडेन, फ्रान्सचे राष्ट्राध्यक्ष इमॅन्युएल मॅक्रॉन, ऑस्ट्रेलियाचे पंतप्रधान अँथनी अल्बानीज, जर्मनीचे चान्सलर ओलाफ स्कोल्झ, ब्रिटनचे पंतप्रधान ऋषी सुनक, जपानचे पंतप्रधान फुमियो किशिदा आणि ब्राझीलचे राष्ट्राध्यक्ष लुईझ इनासिओ लुला-द-सिल्वा आदि नेते उपस्थित राहणार आहेत. तथापि, रशियाचे राष्ट्राध्यक्ष व्लादिमीर पुतीन आणि चीनचे राष्ट्राध्यक्ष शी जिनपिंग हे या परिषदेला गैरहजर राहण्याची शक्यता आहे. मात्र, याबाबतची लेखी पुष्टी अद्याप झाली नाही.