दिल्लीत Drishyam स्टाईल गुन्हा; स्वत:वर हल्ला घडवून शेजाऱ्याला अडकवण्याचा प्रयत्न अंगलट

अमर पाल हा उत्तर दिल्लीतल्या मजनू का टिल्ला इथं राहणारा रहिवासी २९ मे रोजी ६० दिवसांच्या अंतरिम जामिनावर कारागृहाबाहेर आला होता. आपला शेजारी ओमबिर याच्या आईचा खून केल्याप्रकरणी तो शिक्षा भोगत होता. २०१९ साली त्याने आपल्या काही मित्रांसोबत हा खून केला. हे सर्वजण तेव्हापासून शिक्षा भोगत आहेत. २९ मे रोजी जामीन मिळाल्यानंतर त्याने ह्या खुनाचे साक्षीदार असलेल्या ओमबिरच्या परिवारावर दबाव आणण्याचा प्रयत्न केला. मात्र, जेव्हा त्याचा हा प्रयत्न फसला, तेव्हा त्याने आपला भाऊ गुड्डू आणि चुलत भाऊ अनिल यांच्या मदतीने एक कट रचला. ओमबिर आणि त्याचा परिवार आपल्यावर हल्ला करत आहे, अशी बनावट तक्रार त्याने पोलिसांत दिली. अमर पालने त्याच्या दोन्ही भावांना दृश्यम हा चित्रपट पाहायला सांगितला आणि ठरवलं की असं काही वातावरण तयार करायचं की ज्यामुळे हे सिद्ध व्हायला हवं की ओमबिरने त्याच्यावर हल्ला केला आहे.

या कटानुसार, अमरने आपल्या आजूबाजूच्या लोकांना सांगायला सुरुवात केली की, ओमबिर आणि त्याचा परिवार आपल्याला धमकावत आहेत, बदला घ्यायच्या प्रयत्नात आहेत. त्यानं देशी पिस्तुल आणि जिवंत काडतुसंही खरेदी केली, जेणेकरुन हा कट खरा वाटेल. अमरचा चुलत भाऊ अनिलने या कटात त्याचा मेहुणा मनिषलाही सहभागी करुन घेतलं. त्यानंतर असं ठरलं की अनिल अमरवर गोळी झाडेल आणि सगळा आळ ओमबिर आणि त्याच्या परिवारावर जाईल. पोलिसांनी कटाच्या या नियोजनाबद्दलची माहिती दिली.

हेही वाचा- “दहशतवादी संघटनांनीही एवढं नुकसान केलं नाही जेवढं गांधी परिवाराने केलं आहे”, चित्रपट निर्मात्याचा हल्लाबोल

हा कट यशस्वी करण्यासाठी या सर्वांनी अमर जिथे रोज जायचा आणि जिथे त्याच्या विश्वासातले बरेच लोक आहेत, अशा खायबर पास या ठिकाणाची निवड केली. २९ जून रोजी अमर या भागात गेला, तिथे बराच वेळ फिरला आणि लोकांना हे पटवून दिलं की आपला कोणीतरी पाठलाग करत आहे. त्यानंतर त्याने आपल्या सहकाऱ्यांना त्याठिकाणी बोलावलं. त्यानुसार, गुड्डू, अनिल आणि मनिष तिथे दाखल झाले.

आता, अनिलने अमरवर गोळी झाडली आणि इतरांसह तो पळून गेला. अमर जखमी झाल्याचं नाटक करत जवळच असलेल्या आपल्या मित्राकडे गेला आणि त्याला सांगू लागला की हा हल्ला ओमबिर आणि त्याच्या परिवाराने घडवून आणला आहे.

या घटनेनंतर पोलिसांनी यासंदर्भात तपास सुरु केला. अमर पालच्या परिवाराने पोलिसांना आपल्याला ओमबिर आणि त्याच्या परिवारावर हल्ल्याचा संशय असल्याचं सांगितलं. मात्र, पोलिसांना काहीतरी गोंधळ असल्याचं लक्षात आलं. त्यानंतर पोलिसांनी संशय येऊन अनिलला ताब्यात घेतलं. सुरुवातीला त्याने पोलिसांना फसवण्याचा प्रयत्न केला, मात्र त्यानंतर त्यानं संपूर्ण प्लॅन पोलिसांना सांगितला. आणि अमरचा हाही प्रयत्न फसला. पोलिसांनी त्याच्याकडून देशी पिस्तुल आणि काडतुसंही जप्त केली. अमर सध्या उपचार घेत आहे तर पोलीस गु़ड्डू आणि मनिषचा तपास करत आहेत.