जलालाबाद नव्हे आता ‘परशुरामपुरी’, योगी सरकारच्या नामांतर प्रस्तावाला केंद्राची परवानगी; का घेतला निर्णय?

जितिन प्रसाद यांनी काय म्हटलं आहे?

जलालाबाद हे नाव बदलून परशुरामपुरी करण्याबाबत आमचा कुठलाही आक्षेप नाही. केंद्र सरकारच्या गृह मंत्रालयाने यासाठी संमती दिल्याबद्दल मी केंद्रीय गृहमंत्री अमित शाह यांचे आभार मानतो असंही त्यांनी म्हटलं आहे. तसंच हा सगळ्या सनातनी लोकांसाठी आणि धर्माभिमानी लोकांसाठी गौरवाचा क्षण आहे असंही जितिन प्रसाद यांनी म्हटलं आहे.

जलालाबादचं नाव बदलण्याचा निर्णय का घेण्यात आला?

जलालाबाद हे ठिकाण भगवान परशुराम यांचं जन्मस्थळ आहे. या ठिकाणी भगवान परशुराम यांचं पुरातन ऐतिहासिक मंदिरही आहे. त्यामुळे जलालाबादचं नाव परशुरामपुरी करण्यात यावं अशी मागणी करण्यात येत होती. ती मागणी आता मान्य करण्यात आली आहे. २०१८ आणि २०२३ या दोन वर्षांमध्ये यासंदर्भातले प्रस्ताव नगर परिषदेतही मंजूर झाले होते. आता उत्तर प्रदेशचे मुख्यमंत्री योगी आदित्यनाथ यांनी पाठवलेल्या प्रस्तावानंतर या नावला केंद्रानेही मंजुरी दिली आहे.