Supreme Court On Udaipur Files & Kanhaiyalal Murder Case : ‘उदयपूर फाइल्स’ या आगामी चित्रपटाचं प्रदर्शन रोखण्यास सर्वोच्च न्यायालयाने नकार दिला आहे. कन्हैयालाल हत्याकांड प्रकरणातील आरोपी मोहम्मद जावेद याने हा चित्रपट प्रदर्शित होऊ नये यासाठी सर्वोच्च न्यायालयात याचिका दाखल केली होती. आरोपीने याचिकेत म्हटलं आहे की “या खून प्रकरणावर जयपूरमधील एनआयए न्यायालयात सुनावणी चालू आहे. एका बाजूला या प्रकरणाची सुनावणी चालू असताना दुसऱ्या बाजूला हा चित्रपट प्रदर्शित झाला तर यामुळे खटला प्रभावित होऊ शकतो. निष्पक्ष न्यायासाठी या चित्रपटाच्या प्रदर्शनावर बंदी घालणं गरजेचं आहे.”
मोहम्मद जावेदच्या वकिलांनी न्यायमूर्ती सुधांशू धुलिया व न्यायमूर्ती जोयमाल्या बागची यांच्याकडे याप्रकरणी तातडीने सुनावणी घेण्याची मागणी केली होती. याचिकेत म्हटलं होतं की “४ जुलै रोजी चित्रपटाचा ट्रेलर जारी करण्यात आला आहे. हा ट्रेलर पाहून असं वाटतंय की माझ्या आशिलावर आरोप करणाऱ्या पक्षकारांच्या बाजूने चित्रपट बनवण्यात आला आहे. हा चित्रपट प्रदर्शित झाला तर कनिष्ठ न्यायालयात चालू असलेला खटला प्रभावित होऊ शकतो.”
चित्रपट प्रदर्शित होऊ द्या : सर्वोच्च न्यायालय
आरोपीच्या वकिलांनी केलेला युक्तिवाद ऐकून दोन्ही न्यायाधीशांनी काही वेळ आपसांत चर्चा केली. त्यानंतर न्यायमूर्तींनी सुनावणीस नकार दिला. न्यायमूर्ती म्हणाले, “तुम्ही संबंधित न्यायालयात हे प्रकरण उपस्थित करा.” यावर वकील म्हणाले, “येत्या शुक्रवारी (११ जुलै) चित्रपट प्रदर्शित होणार आहे. त्यामुळे यावर तातडीने सुनावणी होणं आवश्यक आहे.” यावर न्यायमूर्ती म्हणाले, “चित्रपट प्रदर्शित होऊ द्या.”
नेमकं प्रकरण काय?
उदयपूरमध्ये टेलरिंगचं (शिवणकाम) काम करणाऱ्या कन्हैयालाल यांची जून २०२२ मध्ये निर्घृण हत्या करण्यात आली होती. नुपूर शर्मा हिने मोहम्मद पैगंबर यांच्याबद्दल एक आक्षेपार्ह वक्तव्य केलं होतं. कन्हैयालाल यांनी या वक्तव्याचं समर्थन करणारी पोस्ट समाजमाध्यमांवर शेअर केली होती. त्यामुळे मोहम्मद रियाज व मोहम्मद गौस या दोघांनी मिळून कन्हैयालाल यांची हत्या केली. या हत्या प्रकरणात इतरही काहीजण सहभागी असल्याचा दावा केला जात आहे. ‘उदयपूर फाइल्स’ चित्रपटाचं प्रदर्शन रोखण्यात यावं यासाठी सर्वोच्च न्यायालयात याचिका करणारा जावेदही या हत्या प्रकरणातील एक आरोपी आहे.
