कानपूरमध्ये भर बाजारात मोठा स्फोट, आठ जण जखमी

उर्सुला रुग्णालयात उपाचर घेत असलेल्या जखमींपैकी चार जण ५० टक्क्यांहून अधिक होरपळले आहेत. दरम्यान, पोलिसांनी या दुर्घटनेप्रकरणी पाच दुकानदारांना ताब्यात घेतलं आहे. हा स्फोट इतका मोठा होता की बाजारातील काही दुकानं व आसपासच्या घरांच्या खिडक्यांच्या काचा फुटल्या. अनेक भिंतींना भेगा पडल्या आहेत. स्फोटानंतर पाच मिनिटं बाजारात सर्वत्र काळाकुट्ट धूर पसरला होता. सुदैवाने स्कूटरव्यतिरिक्त अन्य कुठल्याही वस्तूने पेट घेतला नाही, कुठल्याही दुकानाला आग लागली नाही. अन्यथा मोठी जीवित व वित्तहानी झाली असती.

फटाके विक्रेता फरार

कानपूरचे संयुक्त पोलीस आयुक्त आशुतोष कुमार म्हणाले, “प्राथमिक तपासानुसार हा स्फोट फटाक्यांमुळे झाल्याचं निदर्शनास आलं आहे. ज्या दुकानाबाहेर स्फोट झाला ते दुकान व आजूबाजूच्या दुकानांमध्ये मोठ्या प्रमाणात फटाके होते. या घटनेनंतर दुकानदार फरार आहे. दुकानात देखील स्फोट झाल्याची शक्यता आहे. आम्ही या दुकानदाराला शोधण्यासाठी पथक रवाना केलं आहे.

ज्या स्कूटरमधील फटक्यांचा स्फोट झाला ती अश्वनी कुमार या कपड्याच्या व्यापाऱ्यांची आहे. ते देखील या दुर्घटनेत जखमी झाले आहेत. त्यांच्या एका नातेवाईकाने सांगितलं की ते फटाके खरेदी करण्यासाठी गेले होते.