करोनाचा भारतावर दूरगामी परिणाम, पुन्हा ओढवली १० वर्षांपूर्वीची स्थिती; संशोधन संस्थेच्या अहवालाचे चिंताजनक निष्कर्ष!

करोनाच्या साथीचे देशभरातील मृत्यूदरावर कशा प्रकारे परिणाम झाले, याचा अंदाज घेण्यासाठी आयआयपीएसकडून हा अभ्यास करण्यात आला होता. या काळामध्ये मोठ्या प्रमाणावर लोक करोनामुळे मृत्यूमुखी पडले आहेत. त्यामुळे त्याचा देशाच्या सरासरी आयुर्मानावर काय परिणाम झाला, याचा निष्कर्ष या अभ्यासातून काढण्यात आला. यासाठी ग्लोबल बर्डन डिसीज स्टडी आणि कोविड इंडिया अॅप्लिकेशन प्रोग्रामच्या पोर्टलवरून माहितीचा वापर करण्यात आल्याचं आयआयपीएसकडून स्पष्ट करण्यात आलं आहे.

दोन वर्षांनी आयुर्मान घटलं

या अभ्यासातील निष्कर्षांनुसार, करोना काळात देशातील सरासरी आयुर्मान दोन वर्षांनी कमी झाल्यातं दिसून आलं आहे. त्यामुळे आता भारतातील सरासरी आयुर्मान हे २०१० मध्ये होतं, तितकं झाल्याचा दावा देखील संस्थेकडून करण्यात आला आहे. करोनाच्या आधी भारतातील सरासरी आयुर्मान पुरुषांसाठी ६९.५ वर्ष इतकं होतं. तेच आता ६७.५ वर्ष अर्थात दोन वर्षांनी घटल्याचं या अभ्यासातून समोर आलं आहे. त्यासोबरतच, महिलांसाठी जे आयुर्मान ७२ वर्ष होतं, ते आता ६९.८ वर्ष अर्थात २ वर्ष चार महिन्यांनी घटलं आहे.

Corona Updates in India : भारतात २४ तासात १६,३२६ नवे रुग्ण, मृतांच्या संख्येतही वाढ

याशिवाय, या अभ्यासातून हे देखील समोर आलं आहे की करोना काळात मृत्यूमुखी पडलेल्या पुरुषांमध्ये प्रामुख्याने ३५ ते ६९ वयोगटातील पुरुषांचा समावेश आहे. सरासरी आयुर्मान घटण्यामध्ये या वयोगटात झालेले मृत्यू प्रामुख्याने कारणीभूत ठरल्याचं देखील या अहवालात नमूद करण्यात आलं आहे.

गेल्या १० वर्षांची मेहनत व्यर्थ

यासंदर्भात बोलताना आयआयपीएसचे सहाय्यक प्राध्यापक सुर्यकांत यादव म्हणतात, “गेल्या १० वर्षांत आपण देशवासीयांचं सरासरी आयुर्मान वाढवण्यासाठी जी काही प्रगती केली होती, ती सगळी करोना काळात धुवून निघाली आहे. आता २०१०मधल्या आयुर्मान पातळीवर आपण जाऊन पोहोचलो आहोत. आता पुन्हा आयुर्मान पूर्ववत करण्यासाठी आपल्याला अनेक वर्ष लागू शकतात”.