“भारत चीनशी जवळीक वाढवतो आहे, पण रशियाकडून तेल खरेदी…”; अमेरिकेचा टॅरिफवरुन नेमका इशारा काय?

आणखी काय म्हणाले पीटर नवारो?

भारताला रशियाकडून तेल खरेदीची आवश्यकता आहे या दाव्याला काहीही अर्थ नाही हा बिनबुडाचा दावा आहे. हा सगळा नफेखोरीचा खेळ आहे. टॅरिफ लागू होण्यासाठी सहा दिवस उरले आहेत. मात्र भारताला हा सगळा घटनाक्रम बहुदा मान्य नाही. आता भारत चीनसह जवळीक वाढवतो आहे. मात्र डोनाल्ड ट्रम्प दुप्पट टॅरिफमध्ये भारताला काही सूट देण्याच्या किंवा मुदतवाढ देण्याच्या तयारीत नाहीत. असं पीटर नवारो यांनी म्हटलं आहे. नवारो म्हणाले, भारत टॅरिफचा महाराजा आहे. आम्ही भारतासह व्यापार करुन नुकसान सहन करतो आहे. भारत आमच्याशी व्यापार करुन जे पैसे कमावतो त्यातून रशियाकडून कच्चं तेल खरेदी करतो, त्यामुळे भारताला मोठा नफा मिळतो असाही आरोप नवारो यांनी केला. परराष्ट्र मंत्री एस. जयशंकर यांनी अमेरिकेबाबत वक्तव्य केलेलं असतानाच नवारो यांचं हे वक्तव्य समोर आलं आहे.

एस. जयशंकर काय म्हणाले होते?

मॉस्कोमध्ये परराष्ट्र मंत्री एस. जयशंकर यांनी स्पष्ट केले की, “रशियन तेलाचे सर्वात मोठे ग्राहक आम्ही नसून, चीन आहे. याचबरोबर रशियन एलएनजीचे सर्वात मोठे खरेदीदारही आम्ही नाही, मला खात्री नाही, पण मला वाटते की ते युरोपियन युनियन आहे. २०२२ नंतर रशियासोबत सर्वात जास्त व्यापार वाढवणारा देश आम्ही नसून, ते दक्षिणेकडे काही देश आहेत. गेल्या काही वर्षांपासून अमेरिकन लोक म्हणत आहेत की, आपण जगातील तेल बाजारपेठा स्थिर करण्यासाठी सर्वकाही केले पाहिजे, ज्यामध्ये रशियाकडून तेल खरेदी करण्याचाही समावेश आहे. आम्ही अमेरिकेकडूनही तेल खरेदी करतो आणि ते प्रमाण वाढत आहे. प्रामाणिकपणे सांगायचे तर, या युक्तिवादाच्या तर्काबद्दल आपण खूप गोंधळलो आहोत”, असेही जयशंकर म्हणाले.