मुंबईतल्या ऑर्थर रोड तुरुंगात मेहुल चोक्सीला आणलं जाणार आहे. बेल्जियमहून त्याला आणलं की मुंबईतल्या ऑर्थर रोड तुरुंगात त्याची रवानगी गेली जाणार आहे. बराक क्रमांक १२ या ठिकाणाचे फोटो समोर आले आहेत. हिरे व्यावसायिक असलेला मेहुल चोक्सी हा पंजाब नॅशनल बँक घोटाळा प्रकरणातील प्रमुख आरोपी आहे. पीएनबी प्रकरणात घोटाळा करुन मेहुल चोक्सी आणि नीरव मोदी दोघंही देश सोडून पळाले होते. आता त्याच्या प्रत्यार्पणाचा मार्ग जवळपास मोकळा झाला असून त्याला मुंबईतल्या ऑर्थर रोड तुरुंगात ठेवलं जाणार आहे.
मेहुल चोक्सीविरोधातले आरोप काय?
भारताने मेहुल चोक्सीच्या विरोधात फसवणूक, कागदपत्रांची हेराफेरी, भ्रष्टाचार यांसारखे गंभीर आरोप केले आहेत. मेहुल चोक्सी सध्या बेल्जियमला आहे. बेल्जियम या ठिकाणी उपरोक्त आरोप हे गंभीर स्वरुपाचे गुन्हे आहेत. मेहुल चोक्सी हा बेल्जियमचा नागरिक नाही. पण तो एक विदेशी नागरिक आहे. सध्या तो बेल्जियम पोलिसांच्या अखत्यारीत आहे. त्याचं प्रत्यार्पण भारतात करण्यात येणार आहे. भारताने ज्या गुन्ह्यांची नोंद त्याच्या विरोधात केली आहे ते सगळे गंभीर श्रेणीतले गुन्हे आहेत.
बेल्जियमच्या न्यायालयाने काय म्हटलंय?
बेल्जियमच्या न्यायालयाने दिलेल्या माहितीनुसार भारतात मेहुल चोक्सीच्या विरोधात भारतीय न्याय संहिता च्या कलम १२० ब, २०१, ४०९, ४२०, ४७७ अ या अंतर्गत विविध गुन्हे दाखल आहेत. या अंतर्गत त्याला दोन ते पाच वर्षांची शिक्षा होऊ शकते. बेल्जियमच्या क्रिमिनल कोडच्या अंतर्गत हे सगळे गुन्हे कलम ६६, १९६, १९७, २१३, २४०, २४१, २४५, २४६ आणि ४९६ च्या अंतर्गत गंभीर आहेत. पुरावे नष्ट करण्याचा प्रयत्न हा बेल्जियममध्ये गुन्हा नाही तो वगळता इतर सर्व गुन्हे हे गंभीर स्वरुपाच्या गुन्ह्यांमध्ये येतात. ३१ डिसेंबर २०१६ ते १ जानेवारी २०१९ या कालावधीत हे सगळे गुन्हे मेहुल चोक्सीने केले आहेत. त्यामुळे भारतात प्रत्यार्पण केल्यानंतर मेहुल चोक्सीला शिक्षा होणार हे निश्चित आहे. त्याच्यासाठी ऑर्थर रोड तुरुंगातील बराक क्रमांक १२ मध्ये व्यवस्था केली जाणार आहे.
ऑर्थर रोडच्या बराक क्रमांक १२ मध्ये मेहुल चोक्सीला ठेवलं जाणार
बे्ल्जियमच्या न्यायालयाने भारत सरकारकडून आलेल्या माहितीनंतर हे सांगितलं आहे की मेहुल चोक्सीला भारतातील मुंबईत असलेल्या ऑर्थर रोड तुरुंगात ठेवलं जाईल. ४६ स्क्वेअर मीटरच्या या बराकीत दोन सेल्स आणि स्वच्छतागृहाची सुविधा असणार आहे. भारताने हे देखील सांगितलं आहे की मेहुल चोक्सीला वैद्यकीय गरज असेल किंवा कोर्टात सुनावणी असेल तेव्हाच बाहेर नेलं जाईल.
