“हे लोक बाबर, अफझल गुरूची पूजा करतील”, बिहारच्या शिक्षणंत्र्यांच्या राम मंदिरावरील टीकेनंतर भाजपाचा संताप

राम मंदिराद्वारे रोजगार मिळणार आहेत का? असा प्रश्न फतेह बहादूर यांनी उपस्थित केला होता. तसेच अयोध्येचं अस्तित्व नाकारत ते म्हणाले, “ती जागा म्हणजे गौतम बुद्ध आणि सम्राट अशोकाची भूमी साकेत होती. अयोध्या अजिबात नव्हती. त्यामुळे साकेतच्या जमिनीवर विद्यापीठे, महाविद्यालये, रुग्णालये उभारायला हवी होती.” फतेह बहादूर यांचा बचाव करताना मंत्री चंद्रशेखर म्हणाले, “आपण आज हिंदुत्वापासून सावध राहण्याची आवश्यकता आहे. मंदिराचा मार्ग हा मानसिक गुलामगिरीचा मार्ग आहे आणि शाळेचा मार्ग हा प्रकाशाचा मार्ग आहे. खरंतर मंदिरांमध्ये लोकांचं शोषण होतं. राम हा तुमच्यात, माझ्यात आणि प्रत्येकात आहे, मग आपण त्याला शोधायला कुठे जाणार? देवाची स्थळं म्हणून ज्या जागा ठरवण्यात आल्या आहेत तिथे केवळ शोषण केलं जातं. या स्थळांद्वारे कुठल्या ना कुठल्यातरी समाजातील काही ठराविक लोक षडयंत्र रचून केवळं स्वतःचे खिसे भरण्याचं काम करतात.”

हे ही वाचा >> काँग्रेसची मतदारसंघनिहाय ‘स्वतंत्र’ चाचपणी; सर्व जागांचा आढावा घेण्यासाठी निरीक्षक नियुक्त

दरम्यान, केंद्रीय गृहराज्यमंत्री नित्यानंद राय यांनी यावर प्रतिक्रिया दिली, तसेच चंद्रशेखर यांच्या वक्तव्यावर संताप व्यक्त केला. नित्यानंद राय यांनी एएनआय या वृत्तसंस्थेशी बातचीत केली. यावेळी ते म्हणाले, राम मंदिर हा सांस्कृतिक स्वातंत्र्याचा मार्ग आहे. हे लोक काहीही बोलत असतात. मला कळत नाही की, यांचं आणि श्रीरामाचं काय वैर आहे. राम मंदिरावर यांचा कसला राग आहे, सातत्याने राम मंदिराचा विरोध का करत असतील? यांची नीती चांगली नाही. मला तर वाटतं, हे लोक भविष्यात बाबर (पहिला मुघल बादशाह), आणि अफझल गुरूची (दहशतवादी) पूजा करतील. परंतु, आपल्या या देशाला अश्फाक उल्लाह खान, कॅप्टन हमीद हवे आहेत. आपल्याला बाबर आणि मोहम्मद अली जिन्ना नको. या देशाला रामाची मर्यादा हवी आहे.