एखाद्याने बदनामी करायचीच ठरवली तर नाईलाज आहे- योगी आदित्यनाथ

उत्तर प्रदेशात कट्टरतावादी हिंदू संघटनांच्या वाढत्या उच्छादावरून करण्यात येत असलेल्या टीकेला योगी आदित्यनाथ यांनी प्रत्युत्तर दिले आहे. एखाद्याने आमची बदनामी करायचीच ठरवले असेल तर आमचा नाईलाज आहे, असे त्यांनी प्रसारमाध्यमांशी बोलताना सांगितले. सहारनपूर आणि आग्रा येथे काही दिवसांपूर्वी भाजप व बजरंग दलाचे कार्यकर्ते पोलिसांना भिडले होते. यावेळी एक खासदार आणि पोलीस अधिकारी जखमी झाला होता. तसेच गेल्या काही दिवसांत उत्तर प्रदेशात स्वयंघोषित गोरक्षकांचा उपद्रवही वाढला आहे. बुलंदशहरमध्ये नुकतेच हिंदू युवा वाहिनी संघटनेच्या कार्यकर्त्यांनी एका मुस्लिम तरूणाला मारहाण केल्याचा प्रकार घडला होता. या पार्श्वभूमीवर पत्रकारांकडून योगी आदित्यनाथ यांना प्रश्न विचारण्यात आले. अनेक इशारे देऊनही कायदा व सुव्यवस्थेचे उल्लंघन का केले जात आहे, असा प्रश्न त्यांना विचारण्यात आला. या प्रश्नाला उत्तर देताना योगी आदित्यनाथ यांनी म्हटले की, एखाद्याने विशिष्ट संघटनेला बदनाम करायचे ठरवलेच असेल तर आमचा नाईलाज आहे. बुलंदशहरची घटना ही संघटनेने केलेला हल्ला नसून हा प्रकार वैयक्तिक वादातून घडल्याचे या प्रकरणातील पीडितांनी मान्य केले आहे. उत्तर प्रदेशात कोणताही भेदभाव नसून कायद्याचे राज्याला आमचे प्राधान्य आहे. त्यामुळे उत्तर प्रदेशात कोणीही असुरक्षित नाही, हे मी हमी देऊन सांगू शकतो, असे योगी आदित्यनाथ यांनी म्हटले.