पाकिस्तानच्या कुरापती सुरूच

पुन्हा शस्त्रसंधीचे उल्लंघन केल्यास पाकिस्तानला जशास तसे उत्तर देण्यात येईल, या भारताच्या इशाऱ्याला भीक न घालता पाकिस्तानने सीमावर्ती भागातील कुरापती सुरूच ठेवल्या आहेत. त्यामुळे सीमेवरील तणावाचे वातावरण कायम आहे. शनिवारी प्रत्यक्ष नियंत्रण रेषेनजीक राजौरी आणि पूँछ भागात पाकिस्तानी रेंजर्सनी केलेल्या गोळीबारात पाच जण जखमी झाले असून त्यात तीन महिलांचा समावेश आहे. पाकिस्तानने गेल्या सहा दिवसांत चार वेळा शस्त्रसंधीचे उल्लंघन केले आहे.
रशियातील उफा शहरात झालेल्या शिखर परिषदेत पंतप्रधान नरेंद्र मोदी व पाकिस्तानचे पंतप्रधान नवाझ शरीफ यांनी उभय देशांतील संवाद वृद्धिंगत करण्याच्या आणाभाका घेतल्या होत्या. मात्र त्यानंतर लगेचच पाकिस्तानने शस्त्रसंधीचे उल्लंघन करण्याचा सपाटा लावत भारतीय हद्दीत गोळीबार आणि बॉम्बफेक करण्यास सुरुवात केली आहे. गेल्या १५ दिवसांत पाकिस्तानने ११ वेळा शस्त्रसंधीचे उल्लंघन केले आहे.