‘कोइम्बतूरचे वाजपेयी’: कसा आहे देशाचे नवे उपराष्ट्रपती सी. पी. राधाकृष्णन यांचा राजकीय प्रवास?

कोण आहेत सीपी राधाकृष्णन?

सीपी राधाकृष्णन यांचे पूर्ण नाव चंद्रपुरम पोन्नुसामी राधाकृष्णन आहे. त्यांचा जन्म २० ऑक्टोबर १९५७ रोजी तामिळनाडूतील तिरुपूर येथे झाला. राधाकृष्णन यांनी बिझनेस अ‍ॅडमिनिस्ट्रेशनमध्ये पदवी घेतली आहे. राधाकृष्णन हे राष्ट्रीय स्वयंसेवक संघासह भारतीय जनसंघाचेही सदस्य होते. ते २००४ ते २००७ पर्यंत तामिळनाडू भाजपाचे प्रदेशाध्यक्ष होते.

राधाकृष्णन १९७४ मध्ये वयाच्या १७ व्या वर्षी जनसंघात सहभागी झाले होते. त्यांनी आरएसएसचे तिरुपूर शहर संघ प्रमुख, तालुका संघ प्रमुख आणि जिल्हा संघ प्रमुख म्हणूनही काम केले आहे.

२०२३ मध्ये झारखंडचे राज्यपाल

२०२३ मध्ये राधाकृष्णन यांची झारखंडचे राज्यपाल म्हणून नियुक्ती करण्यात आली आणि पुढे जुलै २०२४ मध्ये ते महाराष्ट्राचे राज्यपाल झाले. राधाकृष्णन १९९८ मध्ये कोइम्बतूरमधून पहिल्यांदाच लोकसभेवर निवडून आले होते. पुढे १९९९ मध्ये त्यांनी पुन्हा एकदा या मतदारसंघातून विजय मिळवला होता. दरम्यान राधाकृष्णन यांना “कोइम्बतूरचे वाजपेयी” म्हटले जाते.

चॅम्पियन टेबल टेनिसपटू

राजकीय कारकिर्दीव्यतिरिक्त, राधाकृष्णन त्यांच्या महाविद्यालयीन काळात एक खेळाडू देखील होते, ते टेबल टेनिसमध्ये चॅम्पियन होते याचबरोबर ते धावपटूही होते.

आरएसएसचे स्वयंसेवक ते उपराष्ट्रपती

• १९७४ मध्ये ते जनसंघाच्या राज्य कार्यकारिणी समितीचे सदस्य.
• १९९६ मध्ये तमिळनाडूतील भाजपाच्या सचिवपदी नियुक्ती.
• १९९८ मध्ये कोईम्बतूर लोकसभा मतदारसंघातून खासदार म्हणून विजयी.
• १९९९ मध्ये कोईम्बतूर लोकसभा मतदारसंघातून पुन्हा एकदा विजय.
• २०२३ मध्ये झारखंडचे राज्यपाल म्हणून नियुक्ती.
• २०२४ महाराष्ट्राचे राज्यपाल.
• २०२५ देशाचे उपराष्ट्रपती.