सत्ताबळासाठी नितीश-मांझी सज्ज

बिहारमधील जनता दल (संयुक्त)च्या विधिमंडळ सदस्यांनी नितीशकुमार यांची नेतेपदी निवड केली असली, तरी मुख्यमंत्री जितन राम मांझी यांनी अद्याप राजीनामा न दिल्यामुळे बिहारमध्ये टोकाचा सत्तासंघर्ष निर्माण झाला आहे. नितीशकुमार यांना आपला पाठिंबा असून जनता दल(यू) सदस्यांनी राष्ट्रीय जनता दल, काँग्रेस, माकप आणि एका अपक्ष आमदाराच्याही पाठिंब्याचे पत्र राजभवनाला दिले, तर विधानसभेच्या अध्यक्षांनीही कुमार यांच्या निवडीला मान्यता दिली आहे. शनिवारी नितीश समर्थक २० मंत्र्यांनी दिलेले राजीनामे स्वीकारण्यात आले असून, नितीशकुमार यांच्या सत्तालालसेमुळेच हा पेच उभा राहिल्याचे भाजपने म्हटले आहे. राज्यपाल सोमवारी पाटण्यात आल्यानंतर हा तिढा सुटेल. 
नितीशकुमार यांना ‘होयबा’मुख्यमंत्री हवा
अग्रलेख: बिहारी बनवे
२४३ सदस्यांच्या बिहार विधानसभेत जनता दलाचे १११, भाजपचे ८७, राजदचे २४, काँग्रेसचे ५ व अपक्ष ५ आमदार असून, १० जागा रिक्त आहेत. मुख्यमंत्री मांझी हे भाजपच्या इशाऱ्यावर काम करत आहेत. बहुतांश आमदारांचा मांझी यांना पाठिंबा राहिलेला नसल्यामुळे त्यांना दिल्लीत नीती आयोगाच्या बैठकीला हजर राहण्याचा काहीही हक्क नव्हता, असे पक्षाचे प्रवक्ते के. सी. त्यागी म्हणाले.