Donald Trump : ‘ट्रम्प यांनी भारताच्या निर्णयांबद्दल बोलू नये’; शशी थरूर यांचे रशियन तेलाच्या मुद्द्यावर थेट अमेरिकेच्या राष्ट्राध्यक्षांना खडे बोल

ट्रम्प यांच्याबद्दल बोलताना काँग्रेस नेते शशी थरूर म्हणाले की, “ ट्रम्प यांनी भारताच्या निर्णयांबद्दल घोषणा करणे योग्य आहे, असे मला खरेच योग्य वाटत नाही. मला वाटते की भारत त्याच्या निर्णयांबद्दल घोषणा करेल. ट्रम्प काय करतील हे आम्ही जगाला सांगत नाही. मला वाटते की ट्रम्प यांनीही भारत काय करेल हे जगाला सांगू नये.”

अमेरिकेचे राष्ट्राध्यक्ष ट्रम्प यांनी दावा केला होता की, पंतप्रधान नरेंद्र मोदी यांनी त्यांना आश्वासन दिले आहे की, भारत वर्षाच्या अखेरीस रशियाकडून होणारी तेलाची आयात मोठ्या प्रमाणात कमी करेल. त्यांच्या या वक्तव्यानंतर बुधवारी काँग्रेस नेते शशी थरूर यांनी ही प्रतिक्रिया दिली आहे.

ट्रम्प काय म्हणाले होते?

भारत वर्षअखेरीस रशियन तेल आयात मोठ्या प्रमाणात कमी करेल. भारत रशियन तेल आयात टप्प्याटप्प्याने बंद करेल आणि वर्षअखेरीस ती ‘जवळजवळ शून्यावर’ आणेल, असा दावा ट्रम्प यांनी केला होता.

“तुम्हाला माहिती आहेच की, भारताने मला शब्द दिला होता की ते रशियन तेल आयात थांबवतील. ही एक प्रक्रिया आहे. तुम्ही ती तत्काळ थांबवू शकत नाही. पण वर्षाच्या अखेरीस, ही आयात जवळजवळ शून्यावर येईल. ही एक मोठी गोष्ट आहे, भारतात रशियातून जवळजवळ ४० टक्के तेल आयात होते. भारत आणि पंतप्रधान नरेंद्र मोदी ग्रेट आहेत. नुकतेच माझ्या त्यांच्याशी बोलणे झाले आहे”, असे राष्ट्राध्यक्ष ट्रम्प यांनी व्हाईट हाऊसमध्ये पत्रकारांशी संवाद साधताना म्हणाले होते.

भारताने दावा फेटाळला

दरम्यान, भारताने यापूर्वीच अमेरिकेला कोणताही शब्द दिला नसल्याचे सांगत, ग्राहकांच्या हिताचे रक्षण करणे हेच प्राधान्य असल्याचे स्पष्ट केले आहे. देशाचे ऊर्जा धोरण स्थिर किंमती आणि पुरवठा सुरक्षित ठेवण्याला प्राधान्य देते, असे केंद्र सरकारने सांगितले आहे.

परराष्ट्र मंत्रालयाने काही दिवसांपूर्वीच स्पष्ट केले आहे की, पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांच्यात कोणताही फोन कॉल झालेला नाही. भारत रशियन तेल खरेदी थांबवेल या ट्रम्प यांच्या दाव्याबद्दल विचारले असता, परराष्ट्र मंत्रालयाचे प्रवक्ते रणधीर जयस्वाल म्हणाले की, “बुधवारी दोन्ही नेत्यांमध्ये कोणताही फोन कॉल झाला नाही.”

डोनाल्ड ट्रम्प यांनी अशा प्रकारचा दावा करण्याची ही पहिलीच वेळ नाही. अमेरिकेने भारतीय मालावर ५० टक्के टॅरिफ लादल्यानंतर लगेच ट्रम्प यांनी वारंवार सांगितले होते की त्यांचे पंतप्रधान नरेंद्र मोदी यांच्याशी बोलणे झाले होते आणि त्यांनी ट्रम्प यांच्या मते रशियाकडून तेल आयात थांबवण्याचे आश्वासन दिले होते.

इतकेच नाही तर ‘ऑपरेशन सिंदूर’ नंतर भारत पाकिस्तान यांच्यात शस्त्रविरामाचा जो निर्णय घेण्यात आला त्याचे श्रेय देखील ट्रम्प वारंवार स्वतः घेत आले आहेत.