एअर इंडियाच्या सेवेचा दर्जा खालावलेला का?; रवींद्र गायकवाड यांचा सवाल

मी बिझनेस क्लासचे तिकीट काढूनही विमानामध्ये बसल्यानंतर संपूर्ण विमानच इकॉनॉमी क्लासचे असल्याचे माझ्या लक्षात आले. मी याबाबत चौकशी केली असता गेल्या एक वर्षापासून असाच प्रकार सुरू असल्याचे उत्तर मला अधिकाऱ्यांकडून देण्यात आले. आम्ही बिझनेस क्लासचे तिकीट काढूनही बिझनेस क्लासची सेवा का दिली जात नाही, असा सवाल मी त्यावेळी विचारला. तेव्हा एक अधिकारी मला म्हणाला की, खासदार-व्हीआयपी काही नाही, तुम्ही खाली उतरा. मी मोदींकडे तुमची तक्रार करेन, असा साद्यंत वृत्तांत गायकवाड यांनी पत्रात नमूद केला आहे. गायकवाड यांनी शिवसेनेचे राज्यसभेतील खासदार अनिल देसाई आणि वकिलांशी बोलून या पत्राचा मसुदा तयार केला.

आपण पैसे न देता विमानप्रवास करत आहोत का? एअर इंडियाच्या ढिसाळ कारभाराकडे, विमानांच्या वेळा न पाळल्या जाण्याकडे आणि एअर इंडियाच्या तोट्याकडे दुर्लक्ष केले जात आहे. खासगी विमान कंपन्यांमध्ये नेमकी उलट परिस्थिती आहे. मग, असा फरक का केला जातो. त्या कंपन्यानांही सरकारकडूनच परवाना दिला जातो. मग एअर इंडियाचीच अवस्था अशी का? या सगळ्याची उच्चस्तरीय समितीतर्फे चौकशी झाली पाहिजे, अशी मागणी रवींद्र गायकवाड यांनी केली आहे.

तत्पूर्वी शुक्रवारी एअर इंडियासहित भारतीय विमान कंपन्यांच्या महासंघाने (फेडरेशन ऑफ इंडियन एअरलाइन्स : ‘एफआयए’) रवींद्र गायकवाड यांच्यावर हवाईप्रवास बंदी घालण्याचा निर्णय घेतला. तर दुसरीकडे दिल्ली पोलिसांनी त्यांच्याविरुद्ध थेट सदोष मनुष्यवधाचा प्रयत्न केल्याबद्दलचा गुन्हा दाखल केला. या गुन्ह्याला तीन वर्षांपर्यंतच्या तुरुंगवासाची शिक्षा आहे.

‘आम्ही खासदार गायकवाड यांच्याविरुद्ध भारतीय दंडविधानातील कलम ३०८ (सदोष मनुष्यवधाचा प्रयत्न : ‘कल्पेबल होमिसाइड नॉट अमाउटिंग टू मर्डर’) आणि ३५५ (गुन्हेगारी हेतूने अप्रतिष्ठा) नुसार गुन्हा दाखल केला आणि सखोल चौकशीसाठी तपास गुन्हे अन्वेषण विभागाकडे (क्राइम ब्रँच) सोपविला आहे,’ अशी माहिती दिल्ली पोलिसाचे प्रवक्ते दीपेंद्र पाठक यांनी रात्री पत्रकार परिषदेमध्ये दिली.