कर्नाटक मुख्यमंत्रीपदाचा निर्णय आज, पेच कायम : सिद्धरामय्या की शिवकुमार?

काँग्रेसचे मुख्यमंत्रीपदाचे दावेदार सिद्धरामय्या यांचा तडजोडीचा प्रस्ताव डी. के. शिवकुमार यांनी फेटाळल्यानंतर, सिद्धरामय्या यांनी सोमवारी दिल्ली गाठली आणि खरगेंशी चर्चा केली. शिवकुमार यांचा वाढदिवस असल्याने त्यांनी राज्यातच राहणे पसंत केले होते. सिद्धरामय्या यांनी दिल्लीकडे धाव घेतली असली तरी शिवकुमार यांनी पक्षाध्यक्षांकडून बोलावणे येईपर्यंत दिल्लीला न जाण्याचा निर्णय घेतल्याचे सांगण्यात आले. आपण दिल्लीला जात नसल्याची माहिती सोमवारी रात्री शिवकुमार यांनी दिली. मी प्रदेशाध्यक्ष आहे. माझ्या कारकीर्दीत काँग्रेसने १३५ जागा जिंकल्या आहेत. मी एकटा लढलो आणि एकटी व्यक्ती बहुमत मिळवू शकते, असे विधान करून शिवकुमार यांनी मुख्यमंत्रीपदाचे आपणच दावेदार असल्याचे स्पष्ट केले. शिवकुमार आज, मंगळवारी दिल्लीत दाखल होण्याची शक्यता आहे. बेंगळूरुमध्ये १८ मे रोजी मुख्यमंत्र्यांचा शपथविधी होईल, असे सांगितले जाते. 

काँग्रेसच्या केंद्रीय नेतृत्वाने कर्नाटकमध्ये पाठवलेल्या तिन्ही निरीक्षकांनी रविवारी रात्री उशिरापर्यंत आमदारांशी स्वतंत्रपणे चर्चा करून त्यांची मते जाणून घेतली. प्रत्येक आमदाराला मुख्यमंत्रीपदासाठी पर्याय निवडण्याची सूचना केली गेली. आमदारांचे म्हणणे ऐकून घेतल्यानंतर सुशीलकुमार शिंदे, दीपक बावरिया आणि संजय सिंह या निरीक्षकांनी सोमवारी संध्याकाळी खरगेंशी सविस्तर चर्चा केली. या वेळी प्रभारी रणदीप सुरजेवाला आणि संघटना महासचिव के. सी. वेणुगोपालही उपस्थित होते. मुख्यमंत्रीपदासाठी बहुसंख्य आमदारांनी सिद्धरामय्या यांना पसंती दिल्याचे सांगितले जाते. मात्र, बंगळूरुमध्ये रविवारी झालेल्या विधिमंडळ पक्षाच्या बैठकीत मुख्यमंत्रीपदाचा निर्णय घेण्याचा अधिकार पक्षाध्यक्षांना देण्याचा ठराव संमत करण्यात आला होता. दरम्यान, कर्नाटकचे राजस्थान होऊ दिले जाणार नाही, मुख्यमंत्रीपदाबाबतचा निर्णय लवकरच घेतला जाईल, असे काँग्रेसचे नेते आणि लोकसभेतील गटनेते अधीर रंजन चौधरी यांनी सांगितले.

प्रस्ताव काय?

पहिली अडीच वर्षे सिद्धरामय्यांकडे मुख्यमंत्रीपद दिले जावे आणि उर्वरित काळासाठी शिवकुमार यांनी मुख्यमंत्रीपदाची धुरा सांभाळावी असा तोडगा काढण्याचा प्रयत्न केला गेला. मात्र हा प्रस्ताव शिवकुमार यांनी फेटाळल्याचे सांगण्यात येते. मुख्यमंत्रीपदाची पहिली अडीच वर्षे आपल्याला देण्याची सिद्धरामय्यांची विनंती शिवकुमार यांना अमान्य आहे. राजस्थान आणि छत्तीसगडमध्येही हेच सूत्र ठरले होते. मात्र, तेथे अशोक गेहलोत आणि भूपेश बघेल यांनी मुख्यमंत्रीपद सोडण्यास नकार दिला आहे. त्याची पुनरावृत्ती कर्नाटकमध्ये होण्याची शक्यता असल्याने शिवकुमार तडजोडीस तयार नसल्याचे समजते. तर दुसरीकडे आमदारांचा आपल्याला पाठिंबा असल्याचे सिद्धरामय्या यांचे म्हणणे आहे.

सोनियांची मध्यस्थी?

सिद्धरामय्या यांना मुख्यमंत्रीपद द्यायचे असेल तर सोनिया गांधी शिवकुमार यांची समजूत काढण्याची शक्यता आहे. शिवकुमार हे सोनिया आणि राहुल गांधी यांच्या जवळचे मानले जातात. परंतु शिवकुमार किंवा सिद्धरामय्या यांनी दिल्लीत सोनियांची भेट घेतल्यानंतर मुख्यमंत्रीपदाच्या नावावर शिक्कामोर्तब केले जाण्याची शक्यता आहे.

सिद्धरामय्यांचे म्हणणे..

शिवकुमार यांच्याकडे मुख्यमंत्रीपदासाठी अद्याप वय हा घटक आहे; परंतु माझ्या बाबतीत तसे नसल्याने पहिले ३० महिने मला मुख्यमंत्रीपद दिले जावे.

शिवकुमार यांचे म्हणणे..

मी प्रदेशाध्यक्ष आहे. माझ्या कारकीर्दीत काँग्रेसने १३५ जागा जिंकल्या आहेत. मी एकटा लढलो आणि एकटी व्यक्ती बहुमत मिळवू शकते, हे सिद्ध केले आहे.