Russian Woman : रशियन महिलेचं मागच्या आठ वर्षांपासून गुहेत वास्तव्य होतं अशी माहिती समोर आली आहे. पोलिसांनी जेव्हा तिला आणि तिच्या मुलींना पाहिलं तेव्हा तिनेच ही माहिती पोलिसांना दिली. दरम्यान ही महिला कशी सापडली तसंच नेमकं काय घडलं ही माहितीही आता समोर आली आहे. तिची चौकशी केल्यानंतर ती आठ वर्षांपासून जंगलातल्या त्या गुहेत मुलींसह राहात होती अशी माहिती समोर आली आहे.
कोण आहे जंगलातल्या गुहेत सापडलेली महिला?
१) नीना कुटीना असं या ४० वर्षीय महिलेचं नाव आहे. ही महिला कुमटा गोकर्णच्या तालुक्यातील जंगलात गेल्या आठ वर्षांपासून राहात होती.
२) रामतीर्थ पर्वताच्या तळाशी हे जंगल आहे. ही रशियन महिला तिच्या दोन मुलींसह राहात होती. या महिलेला दोन मुली असून त्यांची नावं प्रेमा आणि आमा अशी आहेत.
३) २०१७ मध्ये नीना गोव्याला गेली होती. तिथून गोकर्णला आणि त्यानंतर या गुहेत पोहचली. अध्यात्मिक आयुष्याची ओढ वाटू लागल्याने ती इथेच राहिली. घनदाट जंगलात नैसर्गिक रित्या तयार झालेली गुहेत ती वास्तव्य करत होती.
रशियन महिलेचा शोध पोलिसांना कसा लागला?
जंगलात गस्त घालणाऱ्या काही पोलिसांना छोटी पावलं मातीत उमटलेली दिसली. त्यांचा वेध घेतला असता पोलीस निरीक्षक श्रीधर त्यांच्या टीमसह गुहेपाशी पोहचले तिथे नीना आणि तिच्या दोन मुली वास्तव्य करत असल्याचं आढळून आलं. अध्यात्मिक साधना करण्यासाठी आपण ही जागा निवडली आणि शहरी गोंगाटापासून दूर राहणं पसंत केलं असं नीनाने पोलिसांना सांगितलं. नीनाचा व्हिसा २०१७ मध्येच संपला आहे. सुरुवातीला नीनाने कुठलीही ओळख देण्यास नकार दिला. त्यानंतर महिला बालकल्याण विभागातील एका स्थानिक महिलेला बोलवण्यात आलं. योगरत्ना सरस्वती या स्थानिक साध्वी स्त्रीला नीनाने सगळी हकीकत सांगितली. माझा पासपोर्ट आणि व्हिसा हरवला आहे असं नीनाने पोलिसांना सांगितलं. मात्र पोलिसांनी शोधाशोध केली असता गुहेच्या आसपासच त्यांना नीनाचा पासपोर्ट आणि इतर महत्त्वाची कागदपत्रं मिळाली. २०१७ मध्ये तिचा व्हिसा संपला आहे. त्यामुळे नीना मागच्या आठ वर्षांपासून भारतात बेकायदेशीर रित्या राहते आहे हेच समोर आलं आहे.
नीना कुटीना बिझनेस व्हिसावर आली होती भारतात
नीना कुटीना ही बिझनेस व्हिसावर २०१६ मध्ये पहिल्यांदा भारतात आली होती आणि सुरूवातीला ती गोवा आणि गोकर्ण येथील पर्यटन आणि रेस्टॉरंट यांच्याकडे आकर्षित झाली. “पण जेव्हा १७ एप्रिल २०१७ रोजी तिचा व्हिसा एक्सपायर झाला तेव्हा निघून जाण्याऐवजी तिने येथेच राहण्याचा निर्णय घेतला. २०१८ मध्ये एक्झिट परमीट मिळाल्यावर आणि काही काळासाठी नेपाळला गेल्यानंतरही ती भारतात परत आली आणि कर्नाटकच्या जंगलात बेपत्ता झाली,” अशी माहिती पोलिसांनी दिली.
नीनाच्या दोन्ही मुलींचा जन्म भारतातच
पोलिसांनी सांगितले की तिच्या दोन्ही मुलींचा जन्म ती लपून राहत असताना भारतातच झाला. मात्र या मुलींच्या वडिलांबद्दल माहिती देण्यास तिने नकार दिल्याचे पोलिसांनी सांगितले. मुलींच्या प्रसूतीदरम्यान तिला कुठली वैद्यकीय मदत मिळाली होती का याचा प्रशासनाकडून तपास केला जात आहे.
गुहा सोडायला तयार नव्हती रशियन महिला
पोलिसांनी नीनाला समजावून सांगितलं की तू जिथे राहते आहेस तो भाग भूस्खलन होणारा आणि दरड प्रवण आहे. तसंच जंगली श्वापदांची भीतीही या ठिकाणी आहे. साप, नाग, अजगर यांचाही धोका आहे. पोलिसांनी बरीच समजूत घातल्यानंतर नीनाने जंगल आणि ती गुहा सोडण्यास सहमती दर्शवली. यानंतर पोलिसांच्या सुरक्षेत तिला शंकरा प्रसाद फाऊंडेशन या एनजीओकडे सोपवण्यात आलं.
