राजस्थानमध्ये विवाहितेची पती आणि सासरच्यांकडून नग्न धिंड, मुख्यमंत्री गेहलोत यांनी दिले कठोर कारवाईचे आदेश

पोलिसांनी काय सांगितलं आहे?

या प्रकरणी पोलिसांनी दिलेल्या माहितीनुसार या महिलेचे दुसऱ्या पुरुषाशी प्रेमसंबंध आहेत असा संशय तिच्या पतीला आणि तिच्या सासरच्यांना होता. याच संशयावरुन तिची धिंड काढण्यात आली. ही महिला गर्भवती आहे असंही पोलिसांनी म्हटलं आहे. विवाहबाह्य संबंधांच्या संशयावरुन तिच्या पतीने आणि तिच्या सासरच्यांनी तिची नग्न धिंड काढली. ही महिला लग्नानंतरही दुसऱ्या पुरुषाबरोबर राहात होती. त्याच गोष्टीचा राग मनात ठेवून तिला त्या घरातून पळवून गावात आणण्यात आलं. तिच्या पतीने आणि तिच्या सासरच्या मंडळींनी तिला मारहाण करुन तिला विवस्त्र केलं आणि त्यानंतर तिची धिंड काढली.

हे पण वाचा- “मणिपूरमध्ये आया-बहिणींची विवस्त्र धिंड काढत बेआब्रू केलं जातंय, पण…”, शरद पवारांची मोदी सरकारवर टीका

मुख्यमंत्री अशोक गेहलोत यांचं ट्वीट

या घटनेनंतर राजस्थानचे मुख्यमंत्री अशोक गेहलोत यांनी ट्वीट केलं आहे. मुख्यमंत्री अशोक गेहलोत यांनी असं म्हटलं आहे की प्रतापगढ जिल्ह्यात जी घटना घडली ती कौटुंबिक वादातून झाली. एका २१ वर्षीय विवाहितेची नग्न धिंड काढण्यात आली. या प्रकरणातला तिचा व्हिडीओ व्हायरल झाला आहे. या प्रकरणी पोलीस महासंचालकांना कठोर कारवाईचे आदेश दिले आहेत. अशा प्रकारचे अपराध करणाऱ्यांना सभ्य समाजात स्थान नाही. या गुन्हेगारांची जागा गजांच्या आडच आहे. त्यांच्याविरोधात खटला चालवला जाईल आणि फास्ट ट्रॅक कोर्टात जलदगतीने निर्णय घेऊन शिक्षा सुनावली जाईल असं ट्वीट अशोक गेहलोत यांनी केलं आहे.

राजस्थानचे पोलीस महासंचालक उमेश मिश्रा यांनी या घटनेबाबत हे सांगितलं की ही महिला विवाहित असूनही तिचं दुसऱ्या पुरुषावर प्रेम होतं. ही महिला दुसऱ्या पुरुषासह राहात होती. त्यानंतर कथित माहितीनुसार या महिलेच्या पतीने आणि तिच्या सासरच्यांनी या पुरुषाच्या घरुन तिला पळवलं त्यानंतर आपल्या गावी जाऊन तिला मारहाण केली आणि तिची नग्न धिंड काढली. या प्रकरणातल्या आरोपींना अटक करण्यासाठी आम्ही टीम तयार केल्या आहेत. पोलीस अधीक्षक अमित कुमार हेदेखील त्याच गावात गेले आहेत जिथे ही घटना घडली.