Vadodara Car Crash: गुजरातमधील वडोदरा येथे २३ वर्षीय रक्षित चौरसियाने भरधाव वेगाने वाहन चालवत अनेकांना धडक दिली. या घटनेत एका महिलेचा मृत्यू झाला असून ७ जण जखमी झाले आहेत. या घटनेनंतर आरोपी वाहनातून बाहेर येऊन मोठमोठ्याने ओरडत होता. अनदर राऊंड, अनदर राऊंड… असे ओरडत असताना त्याचा व्हिडीओही व्हायरल झाला होता. यानंतर स्थानिकांनी आरोपीला ताब्यात घेऊन पोलिसांच्या स्वाधीन केले. आज पोलिसांनी आरोपी रक्षित चौरसियाला घटनास्थळी आणून प्रत्यक्ष पाहणी केली असता रक्षितला स्वतःच्या पायावर चालताही येत नव्हते. दोन जणांनी त्याला पकडून अक्षरशः उचलून आणले. तसेच पुन्हा पोलीस वाहनात बसवत असताना रक्षित दोन्ही हात कानाला धरून माफी मागताना दिसला.
एएनआय वृत्तसंस्थेने याबाबतचा एक व्हिडीओ शेअर केला आहे. १४ मार्च रोजी सायंकाळी चौरसियाने भरधाव कारने अनेकांना धडक दिली. यामुळे एका महिलेचा मृत्यू झाला. वडोदरा पोलीस आयुक्त नरसिंह कोमर यांनी सांगितले की, या धडकेत तीन वाहनांचे नुकसान झाले आहे.
पोलिसांनी पुढे म्हटले की, मोटर वाहन कायद्या अंतर्गत आरोपीवर गुन्हा दाखल करण्यात आला आहे. तसेच फॉरेन्सिक टिमने घटनास्थळावरून पुरावे गोळा केले आहेत. याआधारे आम्ही आरोपीविरोधात मोटर वाहन कायद्या व्यतिरिक्त निष्काळजीपणे वाहन चालवून मृत्यूस कारणीभूत ठरल्याचाही गुन्हा दाखल करण्यात आला आहे.
पोलिसांनी पुढे म्हटले की, आरोपी रक्षित चौरसिया वाहन चालवत असताना त्याच्याबरोबर गाडीत प्रांशू चौहान नावाचा आणखी एक तरूण बसला होता. अपघात घडला तेव्हा दोन्ही तरूणांनी मद्य किंवा इतर अंमली पदार्थाचे सेवन केले होते का? हे तपासण्यासाठी त्यांच्या रक्ताचे नमुने घेतले आहेत. आरोपीला कडक शिक्षा व्हावी, यासाठी आम्ही सर्वतोपरी काम करत आहोत.
दरम्यान आज सकाळी आरोपीने एएनआय वृत्तसंस्थेशी बोलत असताना वाहन चालविताना आपण मद्य घेतले नसल्याचे म्हटले. तसेच वाहनाचा वेगही ताशी ५० किमी होता, असा दावा त्याने केला. तसेच खड्ड्यांमुळे अपघात झाला आणि नंतर एअरबॅग उघडली गेल्यामुळे पुढचे काही दिसले नाही, असा दावाही केला. आम्ही होळी पाहण्यासाठी गेलो होतो, तिथे कोणतीही पार्टी झाली नाही, असेही आरोपीने सांगितले.
