क्रूरतेचा कळस! तरुणीवर धावत्या रुग्णवाहिकेत बलात्कार; होमगार्ड परीक्षेत बेशुद्ध पडल्यानंतर घडला प्रकार

याबाबत माहिती देताना पोलिसांनी सांगितले की, ही घटना २४ जुलै रोजी घडली असून, मैदानी चाचणीच्या शर्यतीदरम्यान तरुणी बेशुद्ध पडली आणि त्यानंतर तिला घटनास्थळी असलेल्या रुग्णवाहिकेतून रुग्णालयात नेत असताना आरोपींनी तिच्यावर बलात्कार केला.

वरिष्ठ पोलीस अधीक्षक आनंद कुमार यांनी जाहीर केलेल्या प्रसिद्धी पत्रकानुसार, महिला उमेदवारानेच पोलिसांना या घटनेची माहिती दिली. तिच्या तक्रारीवरून, रुग्णवाहिका चालक विनय कुमार आणि तंत्रज्ञ अजित कुमार यांना दोन तासांत अटक करण्यात आली.

या प्रकरणाचा सखोल तपास करण्यासाठी बोधगया विभागीय पोलीस अधिकारी सौरभ जयस्वाल यांच्या नेतृत्वाखाली एक विशेष तपास पथक स्थापन करण्यात आले आहे.

पुरावे गोळा करण्यासाठी एक फॉरेन्सिक टीम पाठवण्यात आली होती, परिसरातील सीसीटीव्ही फुटेजमुळे आरोपींची ओळख पटण्यास मदत झाली. बोधगया पोलीस ठाण्यात प्रथम माहिती अहवाल (एफआयआर) दाखल करण्यात आला असून तपास सुरू आहे.

पोलीस अधिक्षक आनंद कुमार म्हणाले की, तपास लवकर पूर्ण केला जाईल, लवकरच आरोपपत्र दाखल केले जाईल आणि दोन्ही आरोपींविरुद्ध जलदगतीने खटला चालवून कायदेशीर कारवाई करण्याचा प्रयत्न केला जाईल.

इन्स्टाग्रामवर मैत्री, १५ वर्षांच्या मुलीवर सामूहिक बलात्कार

दरम्यान दुसऱ्या एका प्रकरणात बिहारची राजधानी पाटणा येथे तीन अल्पवयीन मुलांनी १५ वर्षांच्या मुलीला प्रेमाच्या जाळ्यात अडकवून तिच्यावर सामूहिक बलात्कार केल्याची घटना समोर आली आहे. एका मुलाने प्रथम पीडितेशी इंस्टाग्रामवर मैत्री केली. नंतर त्याने तिला दानापूरमधील सगुणा मोड येथील हॉटेलमध्ये बोलावले आणि तिच्यावर बलात्कार केला.

यादरम्यान त्याने अश्लील व्हिडिओ बनवला. त्यानंतर तो व्हायरल करण्याची धमकी देत त्याने तिला पुन्हा हॉटेलमध्ये बोलावले. तेथे इतर दोन मुले उपस्थित होती. त्या ठिकाणी या दोन्ही मुलांनीही पीडितेवर सामूहिक बलात्कार केला. पोलिसांनी अलीकडेच तीन अल्पवयीन मुलांना अटक केली आणि मार्च महिन्यात घडलेल्या या लज्जास्पद घटनेचा खुलासा केल्याचा दावा केला.

पोलिसांच्या म्हणण्यानुसार, बलात्कारानंतर आरोपी मुलांनी पीडितेला धमकावले आणि तिला तिच्या घरातून दागिने आणण्यास सांगितले आणि ते एका सोनाराला विकले. पोलिसांनी दागिने खरेदी करणाऱ्या सोनार अरविंद कुमार पांडेलाही अटक केली आहे.