एच-१बी व्हिसाचे शुल्क वाढताच झोहोचे संस्थापक श्रीधर वेम्बू यांचा महत्त्वाचा सल्ला; म्हणाले, “हीच ती वेळ…”

एएफपीच्या वृत्तानुसार, अमेरिका दरवर्षी ८५ हजार एच-१बी व्हिसा लॉटरी पद्धतीने देते. यामध्ये भारतीय कर्मचाऱ्यांचा वाटा ७० टक्के इतका आहे. एच-१बी व्हिसामुळे अमेरिकेतील कंपन्यांना तंत्रकुशल कर्मचाऱ्यांना देशात आणता येते. सुरुवातीला तीन वर्षांसाठी असलेला या व्हिसाला पुन्हा तीन वर्षांसाठी एकदा मुदतवाढ देता येते.

एच-१बी व्हिसाबाबत श्रीधर वेम्बू काय म्हणाले?

प्रिन्स्टन विद्यापीठातून पदव्युत्तर आणि डॉक्टरेट पदवी मिळवून श्रीधर वेम्बू यांनी सुरुवातीच्या कालखंडात अमेरिकेतील सिलिकॉन व्हॅलीमध्ये नोकरी केली होती. त्यानंतर ते भारतात परतले. आता त्यांनी अमेरिकेत काम करणाऱ्या भारतीय तरूणांना मायदेशी परतण्याचा सल्ला दिला आहे. तसेच त्यांनी सिंधी समाजाचेही उदाहरण दिले आहे. जे पाकिस्तानच्या सिंध प्रांतातून भारतात येऊन स्थायिक झाले.

श्रीधर वेम्बू यांनी एक्सवर केलेल्या पोस्टमध्ये म्हटले, माझ्या सिंधी मित्रांकडून त्यांच्या समाजाबद्दल मी बरेच ऐकले आहे. फाळणीच्या वेळी त्यांचे कुटुंबिय सर्वस्व सोडून भारतात आले. इथे त्यांनी त्यांचे बस्तान पुन्हा बसवले आणि आज ते चांगल्या स्थितीत आहेत.

हीच ती वेळ…

वेम्बू पुढे म्हणाले, मला हे सांगताना दुःख होत आहे, पण अमेरिकेत एच-१बी व्हिसावर काम करणाऱ्या भारतीयांसाठी कदाचित हीच ती वेळ असेल. तुम्ही घरी परत या. तुम्हाला इथे घडी बसविण्यासाठी कदाचित पाच वर्ष लागू शकतात. पण तुम्ही इथे चांगल्या स्थितीत राहू शकता.

वेम्बू शेवटी म्हणाले, “भीतीच्या सावटाखाली जगू नका. धाडसी पाऊल उचला. तुम्ही चांगले काम कराल.”