Karnataka : नव्वदीतही एचडी देवेगौडा उतरले प्रचाराच्या रणधुमाळीत, जेडीएसच्या विजयासाठी रणरणत्या उन्हात प्रचार

सोमवारी, पहिल्याच दिवशी देवेगौडा प्रचारात उतरले. या वेळी त्यांनी बंगळुरूमधून तुमकुर जिल्ह्याच्या सिरा तालुक्यापर्यंत हेलिकॉप्टरने प्रवास केला. तुमकुर जिल्ह्यात १९९४ रोजी झालेल्या निवडणुकीत जेडीएसने ११ विधानसभा मतदारसंघांपैकी नऊ जागा जिंकल्या होत्या. या ठिकाणी पुन्हा एकदा जेडीएसला पाठिंबा मिळेल, असा प्रयत्न होताना दिसत आहे. देवेगौडा यांनी पहिला थांबा पट्टनायकनहळ्ळी मठ येथे घेतला. तेथे श्री नंजवधुता स्वामी यांची भेट घेऊन पुढील प्रचाराला सुरुवात केली. येथील ११ विधानसभा मतदारसंघांत वोक्कालिगा समुदायाचा प्रभाव दिसून येतो. वोक्कालिगा समुदायाची लोकसंख्या १० ते ४० टक्के असल्याचे सांगितले जाते. देवेगौडा कर्नाटकामधील वोक्कालिगा समुदायाचे सर्वात मोठे नेते मानले जातात. काँग्रेसचे प्रदेशाध्यक्ष डीके शिवकुमार आता ही ओळख मिळविण्यासाठी धडपडत आहेत.

हे वाचा >> निवडणूक आयोगाकडून काँग्रेस नेते शिवकुमार, भाजपाचे अन्नामलाई यांच्या हेलिकॉप्टरची तपासणी; राज्यात २५३ कोटींची रोकड जप्त

कर्नाटकच्या मुख्यमंत्रीपदाचा चेहरा म्हणून भाजपाकडून लिंगायत समाजातील मोठ्या नेत्याचे नाव पुढे केले जाऊ शकते, असे विधान भाजपाच्या काही नेत्यांनी केले होते. वोक्कालिगा समाजाची एकगठ्ठा मते जेडीएसच्या बाजूला वळविण्याचा हा प्रयत्न आहे. भाजपाने मात्र लिंगायत नेत्यांच्या वक्तव्यावर मौन राखण्याची भूमिका घेतली.

पट्टनायकनहळ्ळी मठात प्रार्थना केल्यानंतर देवेगौडा यांनी जेडीएसतर्फे आयोजित केलेल्या सभांसाठी सिरा येथे कूच केले. या वेळी मधुगिरी आणि कोराटगेरे येथे ५१ किमींचा प्रवास त्यांनी केला. प्रत्येक जाहीर सभेत त्यांनी त्यांच्या वयाचा उल्लेख करून सहानुभूती मिळविण्याचा आणि जेडीएसच्या कामगिरीचा उल्लेख केला. त्यासोबतच तुमकुर लोकसभा मतदारसंघात २०१९ साली त्यांच्या पराभावावरही त्यांनी भाष्य केले. त्या वेळी काँग्रेस आणि जेडीएसने एकत्र काम न केल्याचा फटका बसल्याचेही त्यांनी सांगितले.

मी नव्वद वर्षांच्या वयातही प्रचारासाठी बाहेर पडलो आहे. १० मे रोजी मतदान होत आहे. मी ८ मेच्या संध्याकाळपर्यंत काम करत राहणार आहे, असे भाषण त्यांनी कोराटगेरे येथे केले. “माझा मुलगा मुख्यमंत्री व्हावा, म्हणून मी प्रचारात उतरलेलो नाही. त्याने याआधी दोन वेळा मुख्यमंत्रीपदाची शपथ घेतलेली आहे. खरे आव्हान कर्नाटकसमोरील प्रश्न सोडविणाऱ्या नेत्यासंबंधीचे आहे आणि तो नेता कुमारस्वामी आहे,” असे विधान देवेगौडा यांनी आपल्या भाषणात केले.

“कुमारस्वामी यांनी शेतकऱ्यांना कर्जमाफी देण्याचे आपले आश्वासन पाळले होते. २०१८ साली जेव्हा काँग्रेस आणि जेडीएस आघाडीचे सरकार काही काळासाठी बनले, तेव्हा सरकारकडे अजिबात पैसे नव्हते. काँग्रेस तेव्हा राईस भाग्य, मिल्क भाग्य… यांसारख्या योजनांवर आधी पैसे खर्च करण्यासाठी आग्रही होती. त्यानंतर कर्जमाफी करू, असे त्यांचे म्हणणे होते. पण कुमारस्वामी यांनी शेतकरी कर्जमाफीचा विषय शेवटपर्यंत नेऊन तो सोडविला,” अशी कामे देवेगौडा यांनी जनतेसमोर सांगितली.

हे ही वाचा >> Karnataka : काँग्रेसला १५० आणि भ्रष्ट भाजपाला केवळ ४० जागा मिळणार; निवडणुकीआधी राहुल गांधींचा दावा

महिलांना उद्देशून देवेगौडा म्हणाले की, तुम्हाला तालुका, जिल्हा आणि ग्राम पंचायतीमध्ये आरक्षण कुणी दिले? मुस्लीम समाजाला चार टक्के आरक्षण कुणी दिले? कृपया खरे सांगा. आम्ही आजवर योग्य मार्गाने चाललो आणि याच मार्गावर आमचा अंतही होईल. भाजपाने काही दिवसांपूर्वीच मुस्लीम समाजाचे चार टक्के आरक्षण रद्द करून, त्यांच्या वाट्याचे आरक्षण इतर जातसमूहांना दिले. सर्वोच्च न्यायालयाने बोम्मई सरकारच्या निर्णयाला ९ मेपर्यंत स्थगिती दिली आहे. जेडीएसचे प्रदेशाध्यक्ष सीएम इब्राहिम यांनीदेखील मुस्लीम आरक्षण रद्द करणे, गाईंची कत्तल आणि हलाल मांस विकण्यावरून जो गोंधळ निर्माण केला जात आहे, याबद्दल भाष्य केले.

संध्याकाळी पाच वाजता देवेगौडा यांनी कोराटगेरे येथून पुन्हा बंगळुरूच्या दिशेने हेलिकॉप्टरने ८५ किमींचा प्रवास केला. दुसऱ्या दिवशी या नव्वदीतल्या नेत्याने पुन्हा एकदा हेलिकॉप्टरने म्हैसूर येथे प्रवास करून दोन विधानसभा मतदारसंघांत प्रचार केला.