लक्षणीय लढत : खासदार पत्नी विरुद्ध फडणवीसांचे विश्वासू असा सामना

काँग्रेसचा हा गड राखणारे काळे कुटुंब लोकसभा निवडणुकीत राष्ट्रवादी काँग्रेसचे अध्यक्ष शरद पवार यांच्या आग्रहास्तव राष्ट्रवादीत (शरद पवार) गेले आणि या निवडणुकीत भाजपशी दोन हात करीत अमर काळे विजयी झाले. विधानसभेत ही जागा राष्ट्रवादीकडे गेली आणि येथून मयुरा काळे यांना उमेदवारी देण्यात आली. त्यामुळे या मतदारसंघातून काँग्रेसचा ‘पंजा’ गायब झाला आहे. खासदार काळे यांनी पत्नीसाठी उमेदवारी आणल्याने आघाडीत नाराजीचा सूर आहे.

महायुतीत विद्यामान आमदार दादाराव केचे यांना डावलून फडणवीस यांचे विश्वासू सहकारी सुमित वानखेडेंना उमेदवारी दिली. त्यामुळे केचे यांनी बंड केले. त्यांच्या बंडखोरी नाट्याचीही राज्यभर चर्चा झाली. त्यांना गृहमंत्री अमित शहा यांच्या दारी नेत समजूत काढण्यात भाजपला यश आले. यातून वानखेडे यांच्यासाठी ‘सर्व काही’ असे पक्षाचे धोरण असल्याचे दिसून आले. लोकसभा निवडणुकीत या मतदारसंघात खासदार अमर काळे यांना सुमारे २० हजार मतांची आघाडी मिळाली होती. यामुळे काळे यांना पत्नीला विजयाचा विश्वास वाटतो.

निर्णायक मुद्दे

● कोणताही कारखाना, सूतगिरणी किंवा अन्य उद्याोग नसल्याने बेरोजगारीचे प्रमाण अधिक आहे. यामुळे सुशक्षित युवा मतदार त्रस्त आहेत. प्रामुख्याने सिंचन सुविधा अपेक्षित आहेत.

● मतदारसंघात कुणबी, तेली, भोयर पवार, आदिवासी समाज प्रामुख्याने आहेत. दोन्ही प्रमुख उमेदवारही कुणबी समाजाचे आहेत. आदिवासी, गवळी समाज निर्णयक भूमिका पार पाडतो, तसेच लक्षणीय संख्येत असलेल्या मुस्लीमांचा कल निर्णायक ठरतो.

● पालिका, जिल्हा परिषद, पंचायत समितीत भाजपचे वर्चस्व आहे. मतदारसंघातील तीनही तालुक्यात आघाडी विरुद्ध युती असाच संघर्ष आहे. पण सत्तेच्या प्रभावातून परिसराचा कायापालट करता येऊ शकतो, हे वानखेडे यांनी दाखवून दिल्याने ते युवा, शेतकरी व छोट्या समाज घटकास आकर्षित करणारे ठरले आहे.