“लोकसभेला साहेबांना खूश केलं, आता विधानसभेला मला खूश करा”; अजित पवारांचं बारामतीकरांना आवाहन!

अजित पवारांनी विधानसभा निवडणुकीच्या प्रचाराला सुरुवात केली आहे. ते गावोगावी जाऊन मतदारांच्या भेटी घेत आहे. जास्तीत लोकांपर्यंत पोहोचण्याचा त्यांचा प्रयत्न आहे. आज बारामतीत अशाच एका प्रचार सभेत बोलताना त्यांनी मतदारांना लोकसभेप्रमाणे भावनिक होऊन मतदान न करण्याचं आवाहन केलं.

हेही वाचा – Chhagan Bhujbal : अजित पवार आणि सुप्रिया सुळे भाऊबीजेच्या निमित्ताने एकत्र येणार? छगन भुजबळ म्हणाले, “निदान पुढच्या वर्षी तरी…”

अजित पवार म्हणाले, “लोकसभेला तुम्ही बोलत नव्हता, पण तुम्ही मनातून ठरवलं होतं. त्यावेळी तुमच्यामध्ये एक अंडरकरंट होता. तेव्हा काहीजण म्हणत होते, ताई निवडणुकीत पडल्या तर साहेबांना या वयात कसं वाटेल? त्यामुळे तुम्ही तेव्हा ताईला मतदान केलं. पण आता विधानसभेची निवडणूक आहे. लोकसभा निवडणुकीत ताईला मतदान करून तुम्ही साहेबांना खूश केलं, आता विधानसभा निवडणुकीत मला मतदान करून खूश करा.”

पुढे बोलताना, “लोकसभा निवडणुकीत तुम्ही दिलेला निकाल मी स्वीकारला. मात्र आता आपल्या भागाच्या विकासासाठी तुम्ही मला मतदान करा. लोकसभेला तुम्ही सुप्रिया सुळे यांना निवडणूक दिलं. आता विधानसभेला घडाळासमोरील बटन दाबून मला विजयी करा. ते त्यांच्या पद्धतीने तालुक्याचा विकास करतील, मी माझ्या पद्धतीने विकास करेन”, अशीही प्रतिक्रियाही त्यांनी दिली.

हेही वाचा – Jitendra Awhad: “अजित पवार मर्द असतील तर…”, जितेंद्र आव्हाड यांचे आक्षेपार्ह विधान; अजित पवार गटाचा पलटवार

दरम्यान, लोकसभा निवडणुकीत अजित पवारांनी सुप्रिया सुळेंविरोधात सुनेत्रा पवारांना उमेदवारी दिली होती. या निवडणुकीत सुप्रिया सुळे यांनी सुनेत्रा पवार यांचा मोठ्या मताधिक्याने पराभव केला होता. विशेष म्हणजे अजित पवारांच्या मतदारसंघातही सुप्रिया सुळे यांना तब्बल ४८ हजार मतं मिळाली होती. त्यामुळे बारामतीतील जनता शरद पवार यांच्या बाजुने असल्याचे सिद्ध झालं होतं. त्यानंतर अजित पवारांनी सुनेत्रा पवार यांना उमेदवारी देऊन चूक केली, अशी कबुलीही दिली होती.