PM Narendra Modi 75th Birthday : सोनिया गांधी यांच्या नेतृत्वाखालील फाऊंडेशननेच नरेंद्र मोदींना दिला होता ‘राजीव गांधी सर्वोत्कृष्ट मुख्यमंत्री’ पुरस्कार; त्याचे कारण काय?

पंतप्रधान नरेंद्र मोदी आज १७ सप्टेंबर रोजी वयाची ७५ वर्षे पूर्ण करत असून त्यानिमित्ताने त्यांच्याशी संबंधित अनेक गौरवपर बाबींना त्यानिमित्ताने उजाळा दिला जात असून त्यात राजीव गांधी फाऊंडेशनने २००५ साली केलेल्या या गौरवाचा विशेष उल्लेख केला जात आहे. महत्त्वाचे म्हणजे त्या आधी २००२ साली गोध्रा हत्याकांडानंतरच्या दंगलीसाठी नरेंद्र मोदी यांचा उल्लेख काँग्रेसतर्फे ‘मौत का सौदागर’ असा करण्यात आला होता.

मुंबईच्या मंत्रालयातील माहिती गुजरातला कळते कशी?

राजीव गांधी फाऊंडेशनने आता स्वतःला शिक्षण क्षेत्रामध्ये झोकून दिले आहे. मात्र त्यावेळेस सर्वोत्कृष्ट गव्हर्नन्ससाठी मुख्यमंत्र्‍यांचा गौरव केला जात असे. त्यावेळेस उद्योगपूरक वातावरण निर्माण करून, उद्योगांना त्यांचे स्वातंत्र देत राज्याची भरभराट केल्याबद्दल मोदींना मुंबईमध्ये एका खास कार्यक्रमात गौरविण्यात आले होते. महत्त्वाचे म्हणजे त्यावेळेस अनेक उद्योगांनी महाराष्ट्रातून काढता पाय घेण्यास सुरुवात केली होती आणि परस्पर गुजरात गाठले होते. महाराष्ट्रातील उद्योग परस्पर गुजरातला नेताना मोदी यांनी दाखविलेल्या कार्यप्रवणते संदर्भातील एक वृत्त त्यावेळेस ‘लोकसत्ता’ने प्रसिद्धही केले होते. महाराष्ट्राच्या मंत्रालयातील उद्योग विभागात येणारी फाईल आणि त्यातील माहिती गुजरातला कशी कळते या संदर्भात तत्कालीन मुख्यमंत्री विलासराव देशमुख यांनी चौकशीचे आदेशही दिले होते.

स्क्रॅप डीलर्स गुजरातला…

महाराष्ट्रातील महत्त्वाच्या डेअरी उद्योगाने आणि दारुखाना परिसरातील स्क्रॅप डीलर्सनी त्यावेळेस गुजरात गाठले होते. दारुखाना परिसरात स्क्रॅप डीलर्सचा व्यवसाय मोठा होता. दर पावसाळ्यात तिथे चिखलाचे साम्राज्य असायचे आणि प्रतिवर्षी तेथील उद्योजक एकत्र येऊन महाराष्ट्राच्या मुख्यमंत्र्यांना या उद्योगाच्या अडीअडचणींकडे लक्ष देण्याची विनंती करायचे. याची माहिती मिळाल्यानंतर गुजरातचे तत्कालीन मुख्यमंत्री असलेल्या मोदी यांनी तत्कालीन उद्योगमंत्र्यांना भर पावसात मुंबईतील दारुखान्याच्या चिखलात पाठवले. उद्योगमंत्र्यांनी भर पावसात या परिसरास भेट देऊन तेथील उद्योगांना गुजरातमध्ये येऊन स्थायिक होण्याची ऑफर दिली. आणि त्यातील दोघांनी त्यानंतर लगतच्या कालखंडात स्थलांतरही केले.

चौकशीचे आदेश

असाच अनुभव महाराष्ट्रातील डेअरी उद्योगाशी संबंधित एका संशोधकासही आला होता. मंत्रालयामधील कक्ष अधिकाऱ्याने या तज्ज्ञाला केवळ डेअरी प्रकल्पासाठी जागा दाखविण्यासाठीही विशिष्ट रकमेची मागणी केली होती. याही बाबीची माहिती मिळताच मोदी यांनी स्वतः फोन करून त्यांच्याशी संवाद साधला. त्यांनी प्रस्तुत व्यावसायिकास तत्काळ गुजरातेत निमंत्रित केले, गुजरातमध्ये त्यांचे शासकीय अतिथी म्हणून आगतस्वागत केले. प्रकल्पासाठीच्या जागा पाहाताना वरिष्ठ शासकीय अधिकारी त्यांच्यासोबत होते. गुजरातेत आल्यास कोणकोणते विभाग, कोणकोणत्या सवलती त्यांना देऊ करतील, याची यादीच संशोधकास देण्यात आली आणि तो उद्योगही तेथेच वळवला. ‘लोकसत्ता’तील वृत्त प्रसिद्ध होताच तत्कालीन मुख्यमंत्री विलासराव देशमुख यांनी राज्याच्या मंत्रालयातील फाईल्समधील माहिती गुजरातला कळतेच कशी अशी विचारणा करत या प्रकरणाच्या चौकशीचे आदेशही दिले होते. दरम्यानच्या काळात मुंबईत येऊन राजीव गांधी सर्वोत्कृष्ट मुख्यमंत्री पुरस्कार घेऊन नरेंद्र मोदी गुजरातेत परतलेही होते!

निवृत्तीची चर्चा आणि वादावर पडदा

दरम्यान, पंतप्रधान मोदींनी पंच्याहत्तरीत प्रवेश केल्यानंतर आता ते निवृत्त होणार का, अशी चर्चा सर्वत्र सुरू झाली होती. विशिष्ट वयानंतर आणि त्यातही खास करून पंच्याहत्तरीनंतर राजकारण्यांनी निवृत्त व्हावे, असे मत स्वतः त्यांनी आणि राष्ट्रीय स्वयंसेवक संघाचे सरसंघचालक मोहन भागवत यांनी व्यक्त केले होते. मात्र दोनच आठवड्यांपूर्वी ते काम तर करूच शकतात, असे म्हणत आणि संघाने सांगितले तर आपणही काम करत राहू, असे सांगत सरसंघचालकांनी दोघांच्याही पंच्याहत्तरीनंतरच्या निवृत्तीच्या त्या वादावर पडदा टाकला. त्यामुळे पुढील निवडणुकाही नरेंद्र मोदी यांच्याच नेतृत्त्वाखाली लढल्या जाणार हे आता पुरते स्पष्ट झाले आहे.