काल म्हणजेच ३१ ऑगस्ट २०२२ रोजी महाराष्ट्रातील घराघरामध्ये गणरायाचे आगमन झाले. भक्तिभावाने आणि उत्साहात बाप्पाचे स्वागत करण्यात आले. घरोघरी आरती आणि भजनांचा आवाज घुमू लागला. अशातच मुंबईतील विलेपार्ले पोलीस स्टेशनमध्येही बाप्पाचे आगमन झाले. मुंबई पोलिसांनी यंदा गणेशोत्सवाच्या निमित्ताने ‘पोलीस बाप्पाचे’ स्वागत केले.
पोलीस ठाण्याचे इन्स्पेक्टर राजेंद्र काणे यांनी सांगितले की ‘पोलीस बाप्पा’ आणण्यामागचा हेतू लोकांमध्ये सायबर गुन्ह्यांबद्दल जागरूकता पसरवणे हा आहे. गणेशोत्सवाच्या निमित्ताने गुन्हेगारी, वाहतूक नियम आणि विशेषत: सायबर फसवणुकीबाबत माहिती नसलेल्या लोकांना जागरुक करण्यात येत आहे. यासाठी त्यांनी स्वतः एक गाणेही तयार केले असून या गाण्याचे शीर्षक ‘पोलीस बाप्पा’ असे आहे.
सायबर गुन्हे आणि फसवणुकीबाबत लोकांना जागृत करणारे गाणे मुंबई पोलिसांकडून रिलीज करण्यात आले आहे. या गाण्याचा व्हिडीओ राज्याचे गृहमंत्री देवेंद्र फडणवीस यांनी आपल्या ट्विटर अकाऊंटवरून शेअर केला आहे. नागरिकांनी वेळीच सावध व्हावे आणि सायबर फसवणुकीपासून स्वतःचे कसे रक्षण करावे यासंबंधी माहिती या गाण्यातून देण्याचा प्रयत्न करण्यात आला आहे.
एअर होस्टेसने फ्लाईटमध्ये ‘असं’ केलं गोंडस बाळाचं स्वागत; हा Viral Video जिंकेल तुमचं मन
पोलीस इन्स्पेक्टर काणे यांच्या संकल्पनेतून तयार झालेले हे गाणे प्रसिद्ध गायिका वैशाली सामंत आणि गायक अवधूत गुप्ते यांनी गायले आहे. तसेच या गाण्यामध्ये अभिनेता पुष्कर श्रोत्री, ज्येष्ठ अभिनेते प्रदीप वेलणकर, चिन्मयी सुर्वे, जयवंत वाडकर, माधव देवचके आणि हृषिकेश जोशी यांनी अभिनय केला आहे.
