News Flash

कोल्हापुरात इमारत कोसळली; जीवितहानी टळली

काजवे कुटुंबीयांचे ५० लाखांहून अधिक नुकसान

घर कोसळलेल्या ठिकाणी बचावपथकाने तातडीने मदतकार्य सुरू केले.

येथील सोन्या मारुती चौकानजीक असणाऱ्या साळी गल्लीमध्ये नवीन बांधकामासाठी मशीनच्या साहाय्याने केलेल्या खुदाईमुळे तीन मजली इमारत शुक्रवारी ढासळली. इमारतीमधील परिवार पहाटेच बाहेर पडल्याने या घटनेमध्ये सुदैवाने जीवितहानी टळली. शुक्रवारी सकाळी ९ वाजण्याच्या सुमारास ही घटना घडली. मशीनच्या साहाय्याने २५ फुटांपेक्षा जास्त खुदाई केल्याने शेजारील इमारतीच्या पायास धक्का लागल्याने ही दुर्घटना घडल्याचे महापालिकेच्या वतीने सांगण्यात आले. संबंधित कंत्राटदार करण माने याच्यावर लक्ष्मीपुरी पोलीस ठाण्यात गुन्हा दाखल करण्याचे काम रात्री उशिरापर्यंत सुरू होते. दरम्यान या घटनेमध्ये काजवे कुटुंबीयांचे ५० लाखांहून अधिकचे नुकसान झाले.
शहराच्या मध्यवर्ती परिसर तसेच जुन्या कोल्हापूरची ओळख असणाऱ्या शनिवार पेठ परिसरात दाटीवाटीने इमारती तसेच जुन्या पद्धतीची अनेक बांधकामे आहेत. बहुसंख्य इमारती एकमेकाला खेटून उभ्या आहेत. याच ठिकाणी करण माने यांच्या कॉर्नर स्टोन कंपनीच्या नावे बांधकाम सुरू केले आहे. या जागेवर भव्य अपार्टमेंट उभारण्याच्या कामासाठी पायाखुदाईचे काम गेल्या तीन महिन्यांपासून सुरू आहे.
खुदाई सुरू असलेल्या ठिकाणी शेजारील जागेवर चांदी व्यावसायिक असणाऱ्या प्रकाश मोहन काजवे यांचे दुमली घर आहे. खुदाई करताना कोणाची काही हरकत घेतली नाही मात्र खुदाईचे खोल होत गेल्यावर काजवे परिवाराने आक्षेप घेतला. महिनाभरापूर्वी खुदाई २० फुटांपर्यंत गेले, त्या वेळी काजवे यांच्या इमारतीला हादरे बसू लागले. त्या वेळी काजवे यांनी संबंधित कामगार आणि विकसक माने यांना याबाबत माहिती दिली. पण त्याकडे माने यांनी दुर्लक्ष करीत खुदाईचे काम सुरूच ठेवले.
दरम्यान गुरुवारी (दि.२१) रात्री िभतीला तडे जात असल्याने आणि शेजारच्या इमारतीपासून काजवे यांची इमातरत निसटत असल्याचे नागरिकांच्या लक्षात आल्याने बघ्याची गर्दी जमली. दोन इमारतींमध्ये असणाऱ्या पोकळीतील माती, विटा पडू लागल्या होत्या. सकाळी नऊ वाजण्याच्या सुमारास ही इमारत शेजारच्या इमारतीपासून सुटली आणि पाहता पाहता शेजारी खणलेल्या खड्डय़ात कोसळली. स्वतच्या डोळ्यासमोर घर कोसळताना पाहणाऱ्या प्रकाश काजवे यांना जबर मानसिक धक्का बसला. त्यांचा रक्तदाब वाढल्याने त्यांना तातडीने रुग्णालयात दाखल करण्यात आले.
सोन्या मारुती परिसरात इमारत कोसळल्याची वार्ता वाऱ्यासारखी शहरात पसरली. शहरात दुमजली इमारत कोसळली, ही बहुतांशी पहिलीच वेळ असल्याने शहरवासीयांत खळबळ माजली. या परिसरात बघ्यांची गर्दी जमली. या घटनेची माहिती मिळाल्यानंतर महापालिकेच्या अग्निशमन दलाचे जवान तातडीने मदतकार्यासाठी आले. त्यांचे मदतकार्य सुरू असताना महापालिकेचे अधिकारी, पदाधिकारी यांनी येऊन पाहणी केली. घटनेचा पंचनामा करण्यात आला असून नुकसान भरपाई देण्याबाबतच्या कारवाई करण्यात येणार आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on January 23, 2016 3:40 am

Web Title: building collapsed in kolhapur no mortality
टॅग : Kolhapur
Next Stories
1 निवडणुकीतील अवाढव्य खर्चाबद्दल पवारांना चिंता
2 टेम्पो अपघातात शिक्षकांसह २० विद्यार्थी जखमी
3 श्रीकांत नलवडेंच्या अटकेमुळे ‘कुमुदा शुगर्स’चे करार अडचणीत
Just Now!
X