‘उंच ध्वजस्तंभामुळे कोल्हापूरला नवी ओळख’

देशातील दुसऱ्या क्रमांकाचा सर्वात उंच राष्ट्रध्वज उभारण्याचे ऐतिहासिक कार्य कोल्हापूरमध्ये घडले आहे. येथे येणाऱ्या प्रत्येकाच्या मनामध्ये हा ध्वज देशभक्तीची ऊर्जा निर्माण करेल. यानिमित्ताने आज कोल्हापूरने महाराष्ट्राला एक नवी ओळख दिली आहे. महाराष्ट्र दिनी राज्यातील सर्वात उंच आणि देशातील दुसऱ्या क्रमांकाचा सर्वात उंच राष्ट्रध्वज भेट दिल्याबद्दल कोल्हापूरकरांचे अभिनंदन केले पाहिजे, असे प्रतिपादन मुख्यमंत्री देवेंद्र फडणवीस यांनी  येथे केले.

कोल्हापूर रस्ते सौंदर्यीकरण प्रकल्पांतर्गत कोल्हापूर पोलीस उद्यानामध्ये उभारण्यात आलेल्या ३०३ फुट उंचीच्या ध्वजस्तंभाचे अनावरण आणि नूतनीकरण करण्यात आलेल्या पोलीस उद्यानाचा लोकार्पण सोहळ्यावेळी मुख्यमंत्री देवेंद्र फडणवीस बोलत होते. हेलिकॉप्टरमधून ध्वजावर पुषपवृष्टी करण्यात आली.

देशभरातील आणि जगभरातील अंबाबाईच्या दर्शनाला येणारे भाविक या पोलीस उद्यानाला आणि राष्ट्रध्वजाला भेट देतील आणि येथून राष्ट्रभक्तीची ऊर्जा घेतील, असा उल्लेख करून मुख्यमंत्री फडणवीस यांनी पोलीस दलातील सुधारणांची माहिती दिली. ते म्हणाले, पोलीस दलातील सहायक उपनिरीक्षक यांच्यापेक्षा खालील श्रेणीतील सेवानिवृत्त पोलिसांसाठी महात्मा फुले जनआरोग्य योजना सुरू करण्यात येणार असून सेवानिवृत्त कर्मचारी आणि त्यांचे कुटुंबीय यांना विविध प्रकारच्या १२०० आजारांवर मोफत उपचार मिळतील, अशी योजना करण्याचा निर्णय राज्य सरकारने घेतला आहे.

अक्षय कुमारचा मराठी बाणा

उपस्थितांशी मराठीतून संवाद साधत अभिनेते अक्षयकुमार यांनी पहिल्याच वाक्यापासून टाळ्या मिळवण्यास सुरुवात केली. मी पहिल्यांदाच कोल्हापूरला आलोय असे अस्खलीत मराठी बोलून त्यांनी ‘छत्रपती शिवाजी महाराज की जय, छत्रपती शाहू   महाराज की जय’ अशी घोषणा करून उपस्थितांची मने जिंकली.

हेलिकॉप्टरमधून येताना ३०३ फुट उंच राष्ट्रध्वज बघून आपण कोल्हापुरात आलो आहोत याची जाणीव झाल्याचे सांगून हे पोलीस उद्यान पर्यटन स्थळ बनेल असे सांगितले.

८ हजार फुलपाखरांचे उद्यान

पालकमंत्री चंद्रकांत पाटील यांनी, कोल्हापूर जिल्हा आणि शहराच्या पर्यटन वाढीसाठी विविध उपक्रम हाती घेण्यात आले आहेत. येत्या काळात ८ हजार फुलपाखरांचे उद्यान उभारण्यात येणार असल्याचेही त्यांनी या वेळी सांगितले.

राज्याचे पोलीस महासंचालक सतीश माथूर यांनी पोलीसांच्या हुशार पाल्यांसाठी २५ हजार रुपयांपर्यंतची शिष्यवृत्ती योजना सुरु करण्यात आल्याचे त्यांनी सांगितले.  प्रस्ताविक विशेष पोलीस महानिरीक्षक विश्वास नांगरे पाटील यांनी केले. आभार जिल्हा पोलीस अधीक्षक महादेव तांबडे यांनी मानले.