आईवरुन शिव्या प्रकरण: “चंद्रकांत पाटील कोल्हापूरकरांची माफी मागा, नीच वक्तव्य करुन…”; राष्ट्रवादीचे अमोल मिटकरी संतापले

राज्यामध्ये प्रदेशाध्यक्ष असताना केलेल्या कामांचा दाखला देताना चंद्रकांत पाटलांनी २०१९ च्या विधानसभा निवडणुकीचा दाखला दिला. “हातकणंगल्यात रोज उठून आमचे मित्र शेट्टी शिव्या द्यायचे. रोज उठून मोदींना शिव्या द्यायचे. ते माझे खूप चांगले मित्र आहेत. मी त्यांना म्हटलं तुम्ही चूक करताय. ते अशा भावनेत होते की मला कोण हरवणार. सव्वा लाख मतांनी हारवलं त्यांना,” असं पाटील म्हणाले.

नक्की वाचा >> BKC मैदानातील दसरा मेळाव्यात लोक भाषणादरम्यान उठून निघून गेल्याच्या Viral व्हिडीओंवर CM शिंदे म्हणतात, “कोणी ते व्हिडीओ…”

पुढे पाटील यांनी शेट्टी आणि भाजपाच्या एका केंद्रीय मंत्र्याच्या भेटीत आपल्याबद्दल चर्चा झाल्याचा दाखला देताना आपल्याला मोदी आणि शाहांबद्दल किती आदर आहे यासंदर्भातील भाष्य केलं. “परवा आपल्या एका केंद्रीय नेत्याची आणि त्यांची (राजू शेट्टींची) भेट झाल्यानंतर ते म्हणाले की दादांनी मला संपवलं. ते केंद्रीय नेते ४० वर्ष माझ्याशी जोडलेले असल्याने त्यांनी दादा कोणाला संपवत नाही असं शेट्टींना सांगितलं. आई-वडिलांना शिव्या द्या चालेल. ते म्हणतील जाऊ दे. आईवरुन शिव्या देणं आमची कोल्हापूरची पद्धत आहे. पण दादा (चंद्रकांत पाटील) मोदी आणि शाहांना शिव्या देणं सहन करु शकत नाही. नशीब पाडला. बाकी काही करायचा त्याचा स्वभाव नाही,” असं त्या मंत्र्याने सांगितल्याचं चंद्रकांत पाटील म्हणाले.

नक्की वाचा >> ‘सिल्व्हर ओक’वर हल्ला प्रकरणातील ११८ निलंबित ST कर्मचाऱ्यांना CM शिंदेंनी पुन्हा सेवेत घेतलं: शरद पवार म्हणाले, “सरकारचा निर्णय…”

हा किस्सा सांगताना चंद्रकांत पाटलांनी “आईवरुन शिव्या देणं आमची कोल्हापूरची पद्धत आहे,” हे विधान केल्याने अमोल मिटकरींनी आक्षेप घेतला आहे. ट्वीटरवरुन आपला संताप व्यक्त करताना मिटकरींनी, “आईवरुन शिव्या देणं आमची कोल्हापूरची पद्धत आहे. असे नीच वक्तव्य करुन कोल्हापूरच्या मताची बदनामी करणाऱ्या चंद्रकांत पाटलांनी कोल्हापूरकरांची व महाराष्ट्राची तात्काळ जाहीर माफी मागावी” अशी मागणी केली.

मिटकरींच्या आधी कालच राष्ट्रवादीचे आमदार रोहित पवार, काँग्रेसचे नेते नाना पटोले यांनी या विधानावरुन चंद्रकांत पाटलांवर टीका केली आहे.