विश्वचषकात दमदार कामगिरीद्वारे छाप पाडणारे भारतीय खेळाडू केशरचनेच्या बाबतीतही आघाडीवर आहेत. भारतीय क्रिकेट नियामक मंडळाने (बीसीसीआय) गुरुवारी कर्णधार विराट कोहली, हार्दिक पंडय़ा, यजुर्वेद्र चहल आणि महेंद्रसिंह धोनी यांचे यंदाच्या विश्वचषकातील नव्या केशरचनेतील छायाचित्र ‘ट्विटर’वर पोस्ट करून चाहत्यांनाच ‘‘यामधून कोणाची केशरचना सर्वात आकर्षक व अप्रतिम आहे?’’ असे विचारले. दिवसभर या पोस्टवर अनेकांनी ‘रिट्वीट’ करत कोहली व चहलच्या केशरचनेला सर्वाधिक पसंती दर्शवली, तर काहींनी धोनीने कोणतीही केशरचना केली तरी तो नेहमीच सर्वामध्ये उठावदार ठरतो, अशी प्रतिक्रियाही व्यक्त केली. त्याशिवाय हार्दिकने मानेखाली काढलेल्या टॅटूबाबतही चाहत्यांमध्ये चर्चा रंगली होती.