लकमलनंतर शनाकाचे धक्के; भारताची ५ बाद ७४ अशी स्थिती; पुजाराची झुंज पाऊस आणि भारताची पडझड सुरू असल्याचे चित्र ईडन गार्डन्स स्टेडियमवर दुसऱ्या दिवशीही पाहायला मिळाले. सलग दुसऱ्या दिवसाच्या खेळाचा पावसाने बट्टय़ाबोळ केल्यामुळे भारताची ५ बाद ७४ अशी केविलवाणी अवस्था झाली आहे. श्रीलंकेचा वेगवान गोलंदाज दसून शनाकाने शुक्रवारी दोन्ही फलंदाजांना तंबूची वाट दाखवली, तर भारताचा डाव सावरण्यासाठी चेतेश्वर पुजाराचे झुंजार प्रयत्न सुरू आहेत. पावसामुळे नुकसान झालेल्या पहिल्या कसोटीच्या पहिल्या दिवशी सुरंगा लकमलने (३/५) भारताच्या तीन महत्त्वाच्या फलंदाजांना बाद करण्याची किमया साधली. मग दुसऱ्या दिवसावर शनाकाने (२/२३) छाप पाडताना अजिंक्य रहाणे (४) आणि रविचंद्रन अश्विन (४) यांना बाद केले. महत्त्वाचे फलंदाज माघारी परतले असताना पुजाराने बचावाचे उत्तम तंत्र वापरत नाबाद ४७ धावा केल्या. पहिल्या दिवशी ८ धावांवर नाबाद राहणाऱ्या पुजाराने दुसऱ्या दिवशी आत्मविश्वासाने आपल्या डावाला पुढे प्रारंभ केला. त्याने १०२ चेंडूंचा सामना केला आणि आपल्या खेळीत ९ चौकार मारले. खेळपट्टीचा अचूक अंदाज घेत त्याने संयमी फटकेबाजी केली. श्रीलंकेच्या वेगवान गोलंदाजांनी उजव्या यष्टीवर अप्रतिम गोलंदाजी केली. पहिल्या दिवशी लकमलने भारताची ३ बाद १७ अशी दयनीय अवस्था केली होती. दुसऱ्या दिवशी भारतीय फलंदाजांनी त्याला सावधपणे प्रतिकार केला. दिवसअखेर त्याच्या गोलंदाजीचे पृथक्करण ११-९-५-३ असे होते. पुजारा २४ धावांवर असताना लाहिरू गॅमेजचा आखून टप्प्याचा चेंडू त्याच्या हाताला लागला. त्या वेळी त्याने त्वरेने ग्लोव्ह्ज काढले, पण लगेच त्याने स्वत:ला सावरले. पुढील षटकात भारताने अश्विनला गमावले. शनाकाच्या गोलंदाजीवर पॉइंटला दिमुथ करुणारत्नेने झेलला. पहिल्या सत्राचा खेळ पावसाच्या आगमनामुळे १० मिनिटे आधीच संपवावा लागला. या मुसळधार वृष्टीमुळे उपाहारानंतर खेळ होऊ शकणार नाही, हे स्पष्ट झाले. दुपारी पंचांनी मैदानाचा आढावा घेऊन दुसऱ्या दिवसाच्या खेळावर पूर्णविराम दिला. पहिल्या दिवशी फक्त ११.५ षटकांचा खेळ झाल्यानंतर दुसऱ्या दिवशी फक्त २१ षटकांचा खेळ होऊ शकला. धावफलक भारत (पहिला डाव) : लोकेश राहुल झे. डिकवेला गो. लकमल ०, शिखर धवन त्रि. गो. लकमल ८, चेतेश्वर पुजारा खेळत आहे ४७, विराट कोहली पायचीत गो. लकमल ०, अजिंक्य रहाणे झे. डिक्वेला गो. शनाका ४, रविचंद्रन अश्विन झे. करुणारत्ने गो. शनाका ४, वृद्धिमान साहा खेळत आहे ६, अवांतर (बाइज ४, लेग बाइज १) ५, एकूण ३२.५ षटकांत ५ बाद ७४ बाद क्रम : १-०, २-१३, ३-१७, ४-३०, ५-५० गोलंदाजी : सुरंगा लकमल ११-९-५-३, लाहिरू गॅमेज ११.५-३-२४-०, दसून शनाका ८-२-२३-२, दिमुथ करुणारत्ने २-०-१७-०
