वानखेडे मैदानावर एक जागा धोनीसाठी राखीव?? MCA सदस्याने मांडला प्रस्ताव

२०११ साली भारताला विश्वचषक जिंकवून देताना धोनीने लगावलेला षटकार जिथे गेला त्या ठिकाणी एक जागा MCA धोनीसाठी कायमस्वरुपी राखीव ठेवू शकते. भारतीय क्रिकेटसाठी धोनीने दिलेल्या योगदानाचा आदर आणि सन्मान करण्यासाठी MCA ने याचा विचार करावा अशी मागणी अजिंक्य नाईक यांनी आपल्या पत्रात केली आहे. नुवान कुलशेखरच्या गोलंदाजीवर धोनीने ठोकलेला तो षटकार MCA पॅव्हेलियनच्या जागेवर पडला होता. ती जागा शोधून चेंडू जिथे पडला ती जागा धोनीसाठी राखीव करता येईल असं नाईक यांनी सुचवलं आहे.

आतापर्यंत भारतीय क्रिकेटसाठी योगदान देणाऱ्या खेळाडूंचा सन्मान करताना MCA ने मैदानातील स्टँडला खेळाडूंची नावं दिली आहेत. वानखेडे मैदानात सचिन तेंडुलकर, सुनिल गावसकर, विजय मर्चंट या खेळाडूंच्या नावे खास स्टँड आहेत. तसेच पॉली उम्रीगर आणि विनू मंकड या खेळाडूंची नावं वानखेडे मैदानाच्या गेटला दिली आहेत. पण स्टेडीयमवर एखादी सीट खेळाडूसाठी राखीव होण्याची ही पहिलीच वेळ असणार आहे. MCA च्या आगामी बैठकीत नाईक यांच्या मागणीवर चर्चा होऊन अंतिम निर्णय घेतला जाण्याची शक्यता आहे.