करोना विषाणूच्या प्रादुर्भावामुळे PSL चे प्ले-ऑफ सामने स्थगित करण्यात आले होते. आयपीएलचा तेरावा हंगाम संपुष्टात आल्यानंतर पाक क्रिकेट बोर्डाने आपले उर्वरित सामन खेळवले. रविवारी खेळवण्यात आलेल्या दुसऱ्या एलिमीनेटर सामन्यात पाकिस्तानचा गोलंदाज हारिस रौफ चर्चेचा विषय ठरला होता. अंतिम फेरीत प्रवेश मिळवण्यासाठी लाहोर आणि मुलतान हे संघ रविवारी कराचीच्या मैदानात समोरासमोर आले होते.

लाहोर संघाकडून खेळताना आफ्रिकेच्या डेव्हिड वाईजने २१ चेंडूत ४८ धावांची खेळी केली. यानंतर गोलंदाजीतही त्याने ३ बळी घेत आपलं महत्वाचं योगदान दिलं. वाईजच्या सोबतीने लाहोरकडून हारिस रौफनेही ३ बळी घेत मुलतानच्या संघाला खिंडार पाडलं. मुलतानच्या संघाकडून खेळणारा पाकचा माजी अष्टपैलू खेळाडू शाहीद आफ्रिदीचा हारिस रौफने भन्नाट इनस्विंगवर त्रिफळा उडवला….यानंतर हारिसने आफ्रिदीसारख्या मोठ्या खेळाडूला बाद करत त्याची हात जोडून माफीही मागितली. पाहा हा व्हिडीओ…

शाहीद आफ्रिदीनेही हारिसच्या चेंडूचं कौतुक करत गमतीमध्ये पुढच्या वेळी आपल्याला जरा हळू बॉल टाकण्याची विनंती केली आहे.

दरम्यान लाहोरने मुलतानवर मात करत अंतिम फेरीत प्रवेश निश्चीत केला आहे. मंगळवारी खेळवल्या जाणाऱ्या अंतिम सामन्यात लाहोरचा सामना कराचीविरुद्ध होणार आहे.