मेरलिबोन क्रिकेट क्लबच्या द्विशतकी वर्षांनिमित्त आयोजित मैत्रीपूर्ण लढतीदरम्यानच्या वादग्रस्त समालोचनामुळे अ‍ॅन्ड्रय़ू स्ट्रॉस वादाच्या भोवऱ्यात सापडला आहे. इंग्लंडचा माजी कर्णधार असलेल्या स्ट्रॉसने माजी संघसहकारी केव्हिन पीटरसनला उद्देशून आक्षेपार्ह उद्गार काढले. दोन षटकांदरम्यान असणाऱ्या विश्रांतीच्या कालावधीत स्ट्रॉसने हे उद्गार काढले. इंग्लंडमध्ये वाहिनीवर जाहिराती असल्याने हे उद्गार प्रेक्षकांपर्यंत पोहोचले नाहीत, मात्र ऑस्ट्रेलियात जाहिरातविरहित प्रक्षेपण असल्याने स्ट्रॉसचे उद्गार जसेच्या तसे ऐकायला मिळाले. हा प्रकार लक्षात आल्यानंतर स्ट्रॉसने प्रक्षेपणादरम्यान तात्काळ माफी मागितली. पीटरसनच्या चुकीमुळे स्ट्रॉस आणि पीटरसन यांच्यात वितुष्ट निर्माण झाले होते.
