भारताचा ग्रॅँडमास्टर विदित गुजराथीने प्राग मास्टर्स बुद्धिबळ स्पर्धेत चौथ्या फेरीअखेर तीन गुणांसह आघाडी कायम ठेवली आहे. त्याने चौथ्या फेरीत स्वीडनच्या निल्स ग्रॅँडेलियूसविरुद्धचा डाव बरोबरीत सोडवला. भारताचा अन्य ग्रॅँडमास्टर पेंटाल्या हरिकृष्णने अमेरिकेच्या सॅम शॅकलॅँडविरुद्ध बरोबरी स्वीकारली. तिसऱ्या फेरीत हरिकृष्णला पराभव पत्करावा लागला होता. विदित हा भारताचा दुसऱ्या क्रमांकाचा बुद्धिबळपटू आहे. निल्सविरुद्ध त्याला विजयाची संधी होती. मात्र तरीदेखील विदितला ३५व्या चालीला बरोबरी मान्य करावी लागली. पाचव्या फेरीत विदितची लढत इराणच्या अलिरेझा फिरुझाशी होईल. हरिकृष्णसमोर रशियाच्या निकिता विटिगोवचे आव्हान असेल.
