Brad Hogg Says RCB took wrong decision : आयपीएल २०२४ साठी खेळाडूंचा लिलाव १९ डिसेंबर रोजी दुबईमध्ये होणार आहे, परंतु त्यापूर्वी रॉयल चॅलेंजर्स बंगळुरूने एक मोठा निर्णय घेतला आहे. आरसीबीने मुंबईचा अष्टपैलू खेळाडू कॅमेरून ग्रीनचा आपल्या ताफ्यात समावेश केला. यावर ऑस्ट्रेलियाचा माजी फिरकीपटू ब्रॅड हॉगने प्रतिक्रिया दिली आहे. तो म्हणाला आरसीबीचा हा निर्णय अत्यंत चुकीचा आहे आणि त्यामागील कारणही सांगितले. कारण मुंबई इंडियन्सने हार्दिक पंड्याला खरेदी करण्यासाठी आरसीबीसोबत ग्रीनला ट्रेड केले होते.
ग्रीनला खरेदी करणे हा आरसीबीसाठी योग्य निर्णय नाही –
कॅमेरून ग्रीनने मुंबईसाठी एक हंगाम खेळला असून १६ सामन्यात ४५२ धावा केल्या आणि ६ विकेट घेतल्या. आरसीबीने ऑस्ट्रेलियन अष्टपैलू कॅमेरून ग्रीनला १७.५ कोटी रुपयांना विकत घेतले. परंतु हॉगला वाटते की हा योग्य पर्याय नव्हता. हॉगने त्याच्या इन्स्टाग्रामवरील एका व्हिडीओमध्ये सांगितले की, ‘आरसीबीने ग्रीनची निवड करुन चूक केली आहे. कारण त्यांना वाटले की, तो लिलावात आणखी महाग ठरु शकतो, म्हणून त्याला ट्रेड केले. हॉग पुढे म्हणाला की आरसीबीने चुकीची निवड केली. कारण आरसीबीने आधीच त्यांच्या गोलंदाजी लाइनअपवर मोठ्या प्रमाणात खर्च केला आहे. त्यामुळे आता दर्जेदार गोलंदाज खरेदी करण्यासाठी त्यांच्याकडे पैशांची कमतरता आहे.
हॉगला असेही वाटते की आरसीबी ऐवजी ग्रीन दुसर्‍या फ्रँचायझीसाठी योग्य ठरला असता. तो म्हणाला की मुंबईने हार्दिकला त्यांच्याकडे आणण्यासाठी पैसे गोळा करण्याचा प्रयत्न केला आणि व्यावसायिक कारणांमुळे ग्रीनला संघातून वगळले. त्यांच्यासाठी ही एक चांगली चाल होती, परंतु आरसीबीला ती ओळखत आली नाही. कारण त्यांना वाटले ग्रीन लिलावात गेला, तर त्याला खरेदी करण्यासाठी अधिक पैसे मोजावे लागले असते.
हेही वाचा – PAK vs AUS : बाबर आणि पाकिस्तानचा नवा कसोटी कर्णधार शान मसूद यांच्यात कसे आहे नाते? सरफराजने सांगितले सत्य
ग्रीन इतर कोणत्याही संघासाठी योग्य ठरला असता –
ब्रॅड हॉग पुढे म्हणाला, जेव्हा मी आरसीबीकडे पाहतो, तेव्हा मला वाटते की हा एक वाईट निर्णय होता. या संघाकडे बघितले तर ते त्यांच्या फलंदाजीच्या क्रमावर प्रचंड पैसा खर्च करतात, पण चांगल्या गोलंदाजांवर खर्च करण्याएवढी रक्कम त्यांच्याकडे नाही. आयपीएलमध्ये एकूण बचाव करण्यासाठी आणि खेळात समतोल राखण्यासाठी तुम्हाला चांगल्या गोलंदाजांची गरज असते. यामुळे मला असे वाटते की, हा आरसीबीचा योग्य निर्णय नाही. ग्रीन इतर कोणत्याही संघासाठी योग्य ठरू शकला असता, परंतु आरसीबीने हा पर्याय निवडला आणि मला वाटत नाही की त्यांच्यासाठी ही चांगली गोष्ट आहे.
