मुंबई : क्रिकेट सुधारणा समितीच्या सूचनांसंदर्भात मुंबई क्रिकेट संघटनेने (एमसीए) मंगळवारी कार्यकारिणी समितीची तातडीची बैठक बोलावली आहे. लालचंद रजपूत यांच्या नेतृत्वाखालील क्रिकेट सुधारणा समितीत राजू कुलकर्णी आणि समीर दिघे यांचा समावेश आहे. वरिष्ठ आणि अन्य वयोगटांच्या क्रिकेट संघांसाठी प्राथमिक निवड प्रक्रियेतून निवडलेल्या २४ जणांच्या मुलाखती काही दिवसांपूर्वी झाल्या. यासंदर्भात क्रिकेट सुधारणा समितीने काही प्रश्न उपस्थित केले होते. याबाबत चर्चा करण्यासाठी ही बैठक आमंत्रित करण्यात आली आहे. ‘‘७० वष्रे ओलांडलेल्या व्यक्तीकडे निवड समितीची जबाबदारी देता येईल का? ‘एमसीए’ची प्रतिमा जनमानसात डागाळणाऱ्या व्यक्तीला कोणतेही पद देता येईल का? वार्षिक सर्वसाधारण सभेने काढून टाकलेल्या निवड समिती सदस्याला पुन्हा पदभार स्वीकारता येईल का? अशा तीन विषयांवर कार्यकारिणीच्या बैठकीत प्रामुख्याने चर्चा होईल,’’ असे सूत्रांनी सांगितले.
