Asia Cup विजेत्या संघाला बक्षीस म्हणून किती रक्कम मिळणार? उपविजेता संघदेखील होणार मालामाल

भारतीय संघाने आशिया चषक २०२५ स्पर्धेत पाकिस्तानला २ वेळा पराभूत केलं आहे. साखळी फेरीत झालेल्या सामन्यात कुलदीप यादवने १८ धावा खर्च करून ३ गडी बाद केले होते. त्यानंतर सुपर ४ फेरीतील सामन्यात अभिषेक शर्मा भारतीय संघाचा विजयाचा हिरो ठरला होता. त्याने ७४ धावांची तुफानी खेळी केली होती. अभिषेक शर्माने संपूर्ण स्पर्धेत भारतीय संघासाठी दमदार कामगिरी केली आहे. या स्पर्धेत सर्वाधिक धावा करणाऱ्या फलंदाजांच्या यादीत अभिषेक शर्मा अव्वल स्थानी आहे. त्याने आतापर्यंत ३०९ धावा केल्या आहेत. आणखी एक सामना शिल्लक असल्यामुळे तो या धावसंख्येत आणखी भर घालू शकतो.

तर गोलंदाजीत फिरकी गोलंदाज कुलदीप यादवचा बोलबाला पाहायला मिळाला आहे. भारतीय संघाकडून गोलंदाजी करताना कुलदीप यादवने १३ गडी बाद केले आहेत. पाकिस्तानविरुद्धच्या सामन्यात तो आणखी विकेट्स घेऊन संघाला विजय मिळवून देण्याच्या प्रयत्नात असणार आहे.

विजेत्या संघाला बक्षीस म्हणून किती रक्कम मिळणार?

माध्यमातील वृत्तानुसार , यावेळी आशिया चषक स्पर्धेतील बक्षिसेच्या रकमेत वाढ करण्यात आली आहे. यावेळी विजेत्या संघाला २.६ कोटी रूपये रक्कम बक्षीस म्हणून दिली जाऊ शकते. तर उपविजेत्या संघाला १.३० कोटी रुपये बक्षीस म्हणून दिले जाऊ शकतात. गेल्यावेळी दिल्या गेलेल्या बक्षिसेच्या रकमेच्या तुलनेत ही रक्कम दुप्पट आहे. मात्र याबाबत एशियन क्रिकेट काउन्सिलकडून कुठलीही अधिकृत घोषणा करण्यात आलेली नाही.

गेल्या वेळी झालेल्या आशिया चषक स्पर्धेत भारताने श्रीलंकेला पराभूत करून जेतेपदाची ट्रॉफी उंचावली होती. या स्पर्धेत विजेत्या भारतीय संघाला बक्षीस म्हणून १.२५ कोटी रुपये मिळाले होते.