Cheteshwar Pujara: “मला इंग्लंड दौऱ्यावर जायचंय,पण..”, निवृत्तीनंतर पुजाराचा ‘तो’ Video होतोय व्हायरल

पुजाराने रविवारी ( २४ ऑगस्ट) आपल्या सोशल मीडिया अकाऊंटवरून एक पोस्ट शेअर करून निवृत्ती घेत असल्याची घोषणा केली. पुजाराने आपल्या पोस्टमध्ये लिहिले, “भारतीय संघाची जर्सी परिधान करणं, राष्ट्रगीत म्हणणं आणि दरवेळी मैदानात उतरून संपूर्ण ताकदीने खेळणं, या भावना शब्दात व्यक्त करणं अशक्य आहे. ते म्हणतात ना, प्रत्येक गोष्टीचा शेवट असतो. तसंच मी आता भारतीय क्रिकेटच्या सर्व फॉरमॅटमधून निवृत्त होण्याचा निर्णय घेतला आहे.”

पुजाराने निवृत्तीची घोषणा केल्यानंतर त्याच्या एका मुलाखतीचा व्हिडीओ व्हायरल होऊ लागला आहे. हा व्हिडीओ इंग्लंड दौऱ्यासाठी भारतीय संघाची घोषणा होण्याआधीचा आहे. त्यावेळी इंग्लंड दौऱ्यासाठी पुजाराची निवड होणार असल्याची चर्चा होती. या मुलाखतीत त्याला विचारण्यात आलं होतं की, “येत्या १-२ दिवसात इंग्लंड दौऱ्यासाठी भारतीय संघाची घोषणा केली जाणार आहे. मध्यक्रम कमकुवत आहे. तुम्हाला कॉल आला का?” या प्रश्नाचं उत्तर देताना पुजारा होता,”मी इंग्लंड दौऱ्यावर जाण्यासाठी तयार आहे, पण संधी मिळेल की नाही माहित नाही. देशांतर्गत क्रिकेटमध्ये मी चांगली कामगिरी करत असेल, तर नक्कीच मला संधी मिळू शकते. इंग्लंड दौऱ्यासाठी निवड झाली, तर नक्कीच आनंद होईल मला.”

मात्र, पुजाराची इंग्लंड दौऱ्यासाठी निवड केली गेली नव्हती. मधल्या फळीत फलंदाजी करण्यासाठी करूण नायर आणि साई सुदर्शन यांना संधी दिली गेली होती. पुजारा २०२३ मध्ये भारतीय कसोटी संघासाठी शेवटचा सामना खेळताना दिसून आला होता. २०२३ वर्ल्ड टेस्ट चॅम्पियनशिप स्पर्धेतील ऑस्ट्रेलियाविरूद्धचा अंतिम सामना हा पुजाराच्या क्रिकेट कारकिर्दीतील शेवटचा सामना ठरला. त्यानंतर त्याला भारतीय संघासाठी पुनरागमन करण्याची संधी मिळाली नाही.