बर्मिंगहॅममध्ये सुरू असलेल्या २२व्या राष्ट्रकुल क्रीडा स्पर्धेत भारतीय खेळाडूंची विजयी घोडदौड सुरू आहे. अचंता शरथ कमल आणि श्रीजा अकुला यांनी रविवारी (७ ऑगस्ट) टेबल टेनिसच्या मिश्र दुहेरी प्रकारात भारताला सुवर्ण पदक मिळवून दिले. अचंता-श्रीजा जोडीने मलेशियाच्या चुंग जावेन आणि लीन कारेन यांचा ११-४, ९-११, ११-५, ११-६ असा पराभव केला. शरथ कमलचे त्याच्या कारकिर्दीतील मिश्र दुहेरी प्रकारातील हे पहिला सुवर्णपदक ठरले आहे. तर, राष्ट्रकुल स्पर्धेत पहिल्यांदाच सहभागी झालेल्या २४ वर्षीय श्रीजाचे देखील हे पहिलेच पदक ठरले आहे. शरथ कमलने यावर्षीच्या राष्ट्रकुल स्पर्धेत जबरदस्त कामगिरी केली आहे. त्याने पुरुषांच्या सांघिक स्पर्धेत सुवर्ण आणि साथियान ज्ञानसेकरन सोबत पुरुष दुहेरीत रौप्यपदक पटकावले आहे. त्यामुळे श्रीजासोबत मिळवलेले सुवर्ण पदक हे त्याचे एकून तिसरे पदक ठरले आहे. हेही वाचा - IND W Vs AUS W Gold Medal Match in CWG 2022: भारतीय मुली रौप्य पदकाच्या मानकरी; हरमनप्रीतची अयशस्वी झुंज त्यात्पूर्वी, श्रीजाला महिला एकेरीतील कांस्य पदकाच्या लढतीत ऑस्ट्रेलियाच्या यांगझी लिऊविरुद्ध ३-४ असा पराभव पत्करावा लागला होता. ऑस्ट्रेलियाच्या अनुभवी खेळाडूने श्रीजाचा ११-३, ६-११, २-११, ११-७, १३-१५, ११-९, ६-११ अशा फरकाने पराभव केला. हा सामना दीड तासांपेक्षा जास्त काळ चालला.
