वॉर्नरची हेराफेरी!

स्विस आणि अमेरिकेच्या पोलिसांनी फिफा अधिकाऱ्यांना भ्रष्टाचार आणि लाचखोरीच्या आरोपाखाली अटक केल्यानंतर या प्रकरणाला नवीन वळण मिळत आहे. २०१०चा विश्वचषक दक्षिण आफ्रिकेत होण्याकरिता फिफाला दक्षिण आफ्रिका संघटनेकडून १० दशलक्ष डॉलर दिल्याचा संशय अमेरिकन पोलिसांनी व्यक्त केला होता. मात्र प्रत्यक्षात ही रक्कम फिफाचे माजी उपाध्यक्ष जॅक वॉर्नर यांनी वैयक्तिक कामासाठी वापरल्याचे उघडकीस आले आहे. वॉर्नर यांनी रोख रक्कम काढून, क्रेडिट कार्डचे बिल भरून आणि वैयक्तिक कर्ज घेऊन या पैशांचा वापर केल्याचे पुरावे समोर आले आहेत.
२०१०चा विश्वचषक दक्षिण आफ्रिकेत होण्याकरिता १० दशलक्ष डॉलरची लाच दिल्याचा संशय व्यक्त केला होता. मात्र दक्षिण आफ्रिकेने या आरोपाचे खंडन केले आणि २००८ मध्ये ही रक्कम येथील फुटबॉल विकासासाठी दिल्याचा दावा केला होता. वॉर्नर यांनीही भ्रष्टाचाराच्या आरोपात तथ्य नसल्याचा दावा केला होता. मात्र बीबीसीच्या हाती लागलेल्या पुराव्यांमध्ये वॉर्नर यांनी फिफाला दिलेले १० दशलक्ष डॉलर उत्तर-मध्य अमेरिकन आणि कॅरेबियन फुटबॉल असोसिएशनच्या (सीओएनसीएसीएएफ) खात्यात वळविल्याचे समोर आले आहे. वॉर्नर त्यावेळी सीओएनसीएसीएएफचे अध्यक्ष होते. त्यानंतर वॉर्नर यांनी या रकमेचा वैयक्तिक कामासाठी वापर केला. त्रिनिदाद येथील जेटीए सुपरमार्केटमध्ये २००८ ते २००९ या कालावधीत टप्प्याटप्प्याने एकूण ४.८६ दशलक्ष डॉलरची खरेदी झाल्याचे पुरावे समोर आले आहेत. वॉर्नर यांच्याशी संबंधित असलेल्या व्यक्तींच्या नावे ३.६० दशलक्ष डॉलर बँकेतून काढल्याचे, तसेच १.६ दशलक्ष डॉलर वॉर्नर यांच्या क्रेडिट कार्डचे बिलासाठी आणि वैयक्तिक कर्जासाठी वापरल्याचे पुरावे हाती लागले आहेत. ‘‘वॉर्नर यांच्यावर कायदेशीर कारवाई झालीच पाहिजे. या सर्व प्रश्नांची उत्तरे देण्यास ते बांधील आहेत,’’ असे मत त्रिनिदादचे क्रीडामंत्री आणि माजी आंतरराष्ट्रीय फुटबॉलपटू ब्रेंट सांचो यांनी व्यक्त केले आहे.