सानिया मिर्झाबरोबरची माझी जोडी तात्पुरती असून महिलांच्या टेनिस स्पर्धेतील सामन्यांमधील कामगिरीवरच अधिक काळ जोडी ठेवायची की नाही हे अवलंबून आहे, असे माजी जागतिक अव्वल  मानांकित खेळाडू मार्टिना हिंगिस हिने सांगितले.  सानिया हिने या मोसमात चार स्पर्धानंतर सू वेई हिश (चीन तैपेई) हिच्याशी फारकत घेण्याचा निर्णय घेतला. ती आता हिंगिसच्या साथीत खेळणार आहे. हिंगिस म्हणाली, सू वेई व सानिया यांची शैली खूप वेगळी असल्यामुळे अपेक्षेइतके यश त्यांना मिळाले नाही. सानिया फोरहँडच्या फटक्यांबाबत माहीर आहे तर मी बॅकहँडने चांगला खेळ करू शकते. साहजिकच आमची जोडी चांगली जमेल अशी मला खात्री आहे. काही महिने एकत्र खेळण्याची इच्छा असली तरीही पहिल्या काही स्पर्धामध्ये आमची कामगिरी कशी होते यावरच आम्ही पुढचे नियोजन करणार आहोत.