कनिष्ठ विश्वचषक हॉकी स्पर्धा: भारतीय संघ जर्मनीकडून पराभूत

उपांत्यपूर्व सामन्यात दोन गोलच्या पिछाडीनंतर पुनरागमन करणाऱ्या भारताकडे जर्मनीचा भक्कम बचाव व मजबूत आक्रमण यांचे उत्तर नव्हते. तसेच पेनल्टी कॉर्नरवर गोल करण्यात आलेले अपयशही भारताला महागात पडले. भारताला या सामन्यात १२ पेनल्टी कॉर्नर मिळाले, पण यापैकी एकावरही गोल करता आला नाही.  

हेही वाचा >>> लंदाजांमुळे भारताचे वर्चस्व! इंग्लंड महिला संघाविरुद्ध एकमेव कसोटीच्या पहिल्या दिवशीच चारशे पार; चौघींची अर्धशतके

जर्मनीने चारही सत्रांत एकेक गोल केला, तर भारताकडून एकमेव गोल चिरमाको सुदीपने ११व्या मिनिटाला केला. जर्मनीकडून लिये हेसबाकने आठव्या मिनिटाला व ३०व्या मिनिटाला पेनल्टी कॉर्नरवर गोल केले. ग्लेंडर पॉलने (४१व्या मि.) पेनल्टी कॉर्नरवर गोल झळकावला. स्पर्लिग फ्लोरियनने सामना संपण्याच्या दोन मिनिटाआधी मैदानी गोल करत संघाला ४-१ असे आघाडीवर नेले. आता भारताचा कांस्यपदकासाठी सामना होईल. भारताने २००१मध्ये होबार्ट व २०१६मध्ये लखनऊ येथे झालेल्या कनिष्ठ विश्वचषक हॉकी स्पर्धा जिंकल्या होत्या. याशिवाय १९९७मध्ये इंग्लंडच्या मिल्टन किन्स येथे झालेल्या स्पर्धेत भारत उपविजेता होता. दोन वर्षांपूर्वी भुवनेश्वर येथे झालेल्या स्पर्धेत भारताला चौथ्या स्थानी समाधान मानावे लागले. त्यावेळीही भारताला जर्मनीने ४-२ असे नमवले होते. तसेच जोहोर चषकाच्या उपांत्य सामन्यातही भारताला जर्मनीकडून ३-६ असा पराभव पत्करावा लागला होता. भारताला जर्मनीविरुद्ध वारंवार अपयश येत आहे. या वर्षी जर्मनीने पाचपैकी पाच सामन्यांत भारताला नमवले आहे.