पुरुषांच्या हॉकी सामन्यात बेल्जियमची भारतावर मात

युरोप दौऱ्यावर असलेल्या भारतीय पुरुष हॉकी संघाला बेल्जियमविरुद्धच्या सराव सामन्यात १-२ असा पराभव स्वीकारावा लागला.
भारतीय संघाचा आगामी विश्वचषक स्पर्धेसाठी नार्देन (नेदरलँड्स) येथे दौरा सुरू आहे. चुरशीने झालेल्या लढतीत भारताने बेल्जियमविरुद्ध सुरुवातीला खेळावर नियंत्रण मिळवले होते. तथापि १७व्या मिनिटाला बेल्जियमला पेनल्टी कॉर्नर मिळाला. त्याचा फायदा घेत टोम बून याने गोल करीत संघाला आघाडी मिळवून दिली. पूर्वार्धात याच गोलच्या आधारे बेल्जियमने आघाडी राखली होती.
उत्तरार्धात सामन्याच्या ५८व्या मिनिटाला भारताला पेनल्टी कॉर्नर मिळाला. त्याचा फायदा घेत उपकर्णधार रुपींदरपाल सिंगने गोल करत १-१ अशी बरोबरी साधली. ही बरोबरी फार वेळ राहिली नाही. बूनने पुन्हा एकदा गोल झळकावत  बेल्जियमला २-१ अशी आघाडी मिळवून दिली. हीच आघाडी कायम ठेवत बेल्जियमने विजय मिळविला.
भारताने या दौऱ्यात आतापर्यंत लीदेन क्लबला ७-० असे हरवले होते तर डच राष्ट्रीय क्लबविरुद्धचा सामना ३-३ असा बरोबरीत सोडवला होता. भारताचा गुरुवारी नेदरलँड्स राष्ट्रीय क्लबबरोबर सामना होणार आहे.