India vs Pakistan, Asia Cup 2023: आशिया चषकाच्या तिसऱ्या सामन्यात शनिवारी (२ सप्टेंबर) भारतासमोर पाकिस्तानचे आव्हान आहे. कॅंडी येथील पल्लेकेले आंतरराष्ट्रीय क्रिकेट स्टेडियमवर दोन्ही संघ आमनेसामने आहेत. अ गटातील या आवृत्तीतील भारताचा हा पहिलाच सामना आहे. त्याचवेळी पाकिस्तानचा संघ आपला दुसरा सामना खेळत आहे. पहिल्या सामन्यात त्याने नेपाळचा पराभव केला होता. भारतीय कर्णधार रोहित शर्माने नाणेफेक जिंकून फलंदाजीचा निर्णय घेतला आहे. शेअर केलेल्या व्हिडीओमध्ये विराट, हारिस, रोहित आणि बाबर सामन्याआधी भेटले. त्यांच्यातील संभाषणाचा मजेशीर संवाद व्हायरल होत आहे.
कँडी, श्रीलंकेत भारत विरुद्ध पाकिस्तान सामन्यापूर्वी दोन्ही संघातील खेळाडूंमध्ये एकमेकांशी कौटुंबिक संवाद साधताना दिसले. सामन्यापूर्वी झालेल्या सराव सत्रात दोन्ही संघांच्या कर्णधारांनी एकमेकांच्या कुटुंबीयांची तब्येत कशी आहे याबाबत चर्चा केली. त्याचवेळी किंग कोहली आणि हारिस रौफ सराव सत्रादरम्यान मैदानावर चर्चा करताना दिसले.
आशिया चषकाच्या या महत्त्वाच्या सामन्याची सर्वजण आतुरतेने वाट पाहत होते. सामन्यापूर्वी सराव सत्रात भारत आणि पाकिस्तानचे खेळाडू मैदानावर एकत्र आले आणि दोन्ही कट्टर प्रतिस्पर्ध्यांच्या खेळाडूंनी एकमेकांशी मुक्तपणे संवाद साधला. या छोट्या भेटीचा व्हिडीओ पाकिस्तान क्रिकेट बोर्डाने आपल्या ट्वीटर हँडलवर शेअर केला आहे. ज्यामध्ये बाबर आझम, इमाम आणि रोहित शर्मा एकमेकांना भेटताना दिसत आहेत.
व्हिडीओमध्ये बाबर आझमने भारतीय कर्णधाराशी बोलताना पत्नी रितिका आणि मुलगी समायरा यांचीही विचारपूस केली. बाबरने रोहितला त्याच्या कुटुंबाची चौकशी करताना एक प्रश्न विचारला. तो म्हणाला, “कँडीला त्यांना का घेऊन आला नाही रोहित भाई तू? “ त्यावर रोहित हसला आणि म्हणाला की, “मुलगी समायरा शाळेत जायला लागली आहे आणि त्यामुळे तो सोबत येऊ शकला नाही. आता कुणाला तरी घरी ठेवावे लागेलच ना, त्यामुळे बायकोला घरी ठेवले आहे.”
“मी जिथून जातो तिथं कोहली-कोहली असतो”- हारिस रौफ
सामन्यापूर्वी भारताचा वेगवान गोलंदाज विराट कोहली आणि पाकिस्तानचा वेगवान गोलंदाज हारिस रौफ मैदानावर एकत्र बोलताना दिसले. गेल्या वर्षी टी२० विश्वचषकात विराटने हारिसच्या चेंडूवर दोन संस्मरणीय षटकार ठोकले होते. कोहलीला पाहताच रौफला विराटची ती खेळी आठवली. ट्वीटरवर शेअर केलेल्या व्हिडीओमध्ये विराट कोहली मैदानावर उभ्या असलेल्या रौफशी हस्तांदोलन करत आहे. त्यानंतर दोन्ही खेळाडूंनी एकमेकांशी संवाद साधला. या व्हिडीओमध्ये हारिस म्हणतो आहे की, “मी जिथून जातो तिथं कोहली-कोहली असतो.”
भारताचा स्कोअर २० ओव्हरमध्ये १०२/४
भारताच्या १०० धावा पूर्ण झाल्या आहेत. चार विकेट्स पडल्यानंतर इशान किशन आणि उपकर्णधार हार्दिक पांड्या यांनी जबाबदारी स्वीकारली. टीम इंडियाने २० षटकात ४ विकेट्स गमावत १०२ धावा केल्या आहेत. इशान किशन ३२ आणि हार्दिक पांड्या १६ धावांवर नाबाद आहे. टीम इंडियाला दोन्ही खेळाडूंकडून मोठ्या भागीदारीची अपेक्षा आहे.
