‘त्रि’फळाचीत! दक्षिण आफ्रिकेने पाचव्या सामन्यासह मालिका जिंकली

भारताचा दुसरा मोठा पराभव
या लढतीत भारताला दुसऱ्या मोठय़ा पराभवाला सामोरे जावे लागले. यापूर्वी भारताला श्रीलंकेकडून २४५ धावांनी पराभव पत्करावा लागला होता.

दुष्काळग्रस्तांसाठी एमसीएची एक कोटीची मदत
महाराष्ट्रातील दुष्काळग्रस्तांसाठी मुंबई क्रिकेट असोसिएशनने (एमसीए) एक कोटी रुपयांच्या मदतीचा धनादेश भारत-दक्षिण आफ्रिका एकदिवसीय सामन्याच्या मध्यंतराला महाराष्ट्राचे मुख्यमंत्री देवेंद्र फडणवीस यांच्याकडे सुपूर्द केला. भारतीय संघातून खेळणारे मुंबईचे क्रिकेटपटू रोहित शर्मा आणि अजिंक्य रहाणे यांच्या हस्ते हा धनादेश मुख्यमंत्र्यांकडे देण्यात आला. या वेळी एमसीएचे अध्यक्ष शरद पवार, उपाध्यक्ष दिलीप वेंगसरकर, आशीष शेलार आदी मान्यवर उपस्थित होते.

धावफलक
दक्षिण आफ्रिका : क्विंटन डी कॉक झे. कोहली गो. रैना १०९, हशिम अमला झे. धोनी. गो. मोहित शर्मा २३, फॅफ डू प्लेसिस जखमी निवृत्त १३३, ए बी डी’व्हिलियर्स झे. धोनी गो. भुवनेश्वर कुमार ११९, डेव्हिड मिलर नाबाद २२, फरहान बेहराडिन झे. रैना गो. हरभजन १६, डीन एल्गार नाबाद ५, अवांतर (लेग बाइज २, वाइड ९) ११, एकूण ५० षटकांत ४ बाद ४३८
बाद क्रम : १-३३, २-१८७, ३-३९८, ४-४३०.
गोलंदाजी : भुवनेश्वर कुमार १०-०-१०६-१, मोहित शर्मा ७-०-८४-१, हरभजन सिंग १०-०-७०-१, अक्षर पटेल ८-०-६५-०, अमित मिश्रा १०-०-७८-०, सुरेश रैना ३-०-१९-१, विराट कोहली २-०-१४-०.
भारत : रोहित शर्मा झे. ताहिर गो. अॅबॉट १६, शिखर धवन झे. अमला गो. रबाडा ६०, विराट कोहली झे. डी कॉक गो. रबाडा ७, अजिंक्य रहाणे झे. बेहराडिन गो. स्टेन ८७, सुरेश रैना त्रि. गो. रबाडा १२, महेंद्रसिंग धोनी त्रि. गो. ताहिर २७, अक्षर पटेल झे. मिलर गो. स्टेन ५, हरभजन सिंग झे. मॉरिस (बदली खेळाडू) गो. स्टेन ०, भुवनेश्वर कुमार झे. मिलर गो. ताहिर १, अमित मिश्रा पायचीत गो. रबाडा ४, मोहित शर्मा नाबाद ०, अवांतर (लेग बाइज १, वाइड ४) ५, एकूण ३५.५ षटकांत सर्व बाद २२४.
बाद क्रम : १-२२, २-४४, ३-१५६, ४-१७२, ५-१८५, ६-१९५, ७-२०१, ८-२१०, ९-२१९, १०-२२४.
गोलंदाजी : डेल स्टेन ७-०-३८-३, कागिसो रबाडा ७-०-४१-४, कायले अॅबॉट ७-०-३९-१, फरहान बेहराडिन ८-०-५५-०, इम्रान ताहिर ७-१-५०-२.
निकाल : दक्षिण आफ्रिका २१४ धावांनी विजयी
मालिका : ३-२ अशी दक्षिण आफ्रिकेने जिंकली
सामनावीर : क्विंटन डी कॉक
मालिकावीर : ए बी डी’व्हिलियर्स

अमलाच्या जलद सहा हजार धावा
दक्षिण आफ्रिकेच्या डावाची दमदार सुरुवात करणाऱ्या हशिम अमलाने जलद सहा हजार धावा करण्याचा विक्रम आपल्या नावावर केला. यापूर्वी कोहलीने १३६ डावांमध्ये सहा हजार धावा केल्या होत्या. अमलाने १२३ व्या डावात हा पराक्रम केला.
**
वानखेडेवरील सर्वोच्च धावसंख्या
दक्षिण आफ्रिकेने या सामन्यात वानखेडे स्टेडियमवरील सर्वोच्च धावसंख्येला गवसणी घातली. यापूर्वी २०११ च्या विश्वचषकात वानखेडेवर न्यूझीलंडने कॅनडाविरुद्ध ३५८ धावा केल्या होत्या.
**
एका डावात तीन शतकांच्या विक्रमाशी बरोबरी
एकदिवसीय क्रिकेटमध्ये एका डावात तीन शतके झळकावण्याची दक्षिण आफ्रिकेची ही दुसरी वेळ असून त्यांच्याच नावावर हा अनोखा विश्वविक्रम आहे. यापूर्वी १८ जानेवारी २०१५ या दिवशी वेस्ट इंडिजविरुद्धच्या सामन्यात दक्षिण आफ्रिकेकडून ए बी डी’व्हिलियर्स (१४९), हशिम अमला (१५३) आणि रिली रोसोव (१२८) यांनी शतके झळकावली होती.
**
आफ्रिकेची तिसरी सर्वोच्च धावसंख्या
एकदिवसीय क्रिकेटमध्ये सर्वोच्च धावसंख्या करण्याचा पराक्रम श्रीलंकेने केला होता. त्यांनी नेदरलँड्सविरुद्ध ४४३ धावा केल्या होत्या. त्यानंतर या यादीतील २-४ या क्रमांकांवर दक्षिण आफ्रिकेचेच नाव आहे. वेस्ट इंडिजविरुद्ध त्यांनी ४३९ धावा केल्या होत्या. ऑस्ट्रेलियाच्या ४३४ धावांचा पाठलाग करताना आफ्रिकेने ४३८ धावा केल्या होत्या. त्यानंतर रविवारी याच धावसंख्येची आफ्रिकेने बरोबरी साधली.
मुंबई मसाला
आठवण २००३ च्या विश्वचषक अंतिम फेरीची..
वानखेडेवरील लढतीत दक्षिण आफ्रिकेने धुवाधार फलंदाजी करीत २००३ च्या विश्वचषकातील अंतिम फेरीच्या आठवणी ताज्या केल्या. ऑस्ट्रेलियाने जोहान्सबर्ग येथील अंतिम फेरीत भारतीय गोलंदाजीवर प्रहार करीत ३५९ धावांचा डोंगर उभारला होता. दक्षिण आफ्रिकेने भारताविरुद्धच्या निर्णायक लढतीत रविवारी ४३८ धावा करण्याची किमया साधली.
**
दिवेचा पॅव्हेलियन रिकामे
मालिकेतील निर्णायक सामना वानखेडेवर होत असताना दिवेचा पॅव्हेलियन मात्र ९० टक्के रिक्तच होते. मुंबई क्रिकेट असोसिएशनने (एमसीए) गरवारे क्लबला दिवेचा पॅव्हेलियनची तिकिटे दिली होती. ही तिकिटे सामन्यापूर्वी विक्रीला ठेवण्यात आली होती; परंतु त्याला थंड प्रतिसाद मिळाला होता.
**
एबीडी.. एबीडी..
शतकवीर क्विंटन डी कॉक बाद झाल्यावर दक्षिण आफ्रिकेचा कर्णधार एबी डी’व्हिलियर्स मैदानात येत असतानाच ‘एबीडी.. एबीडी..’ अशा घोषणांनी स्टेडियम निनादले. डी’व्हिलियर्सच्या प्रत्येक फटक्याला प्रेक्षकांकडून दिलखुलास पाठिंबा मिळत होता. दोन वर्षांपूर्वीपर्यंत फक्त सचिनचे असे फलंदाजीसाठी स्वागत केले जायचे.
**
धोनी आला धावून..
अक्षर पटेलच्या ४३ व्या षटकातील चौथ्या चेंडूवर फॅफ डू प्लेसिसने लाँग ऑनला षटकार खेचला खरा, पण त्यानंतर लगेचच त्याच्या उजव्या पायाचे स्नायू दुखावले. त्या वेळी यष्टीजवळ असलेला धोनी आपल्या चेन्नई सुपर किंग्जमधल्या सहकाऱ्यासाठी धावून आला. त्याने आफ्रिकेचा फिजिओ मैदानात येईपर्यंत फॅफचे पाय वर धरून ठेवले आणि त्याला दिलासा दिला.
**
अशी ही पाच शतके
या सामन्यात दक्षिण आफ्रिकडून क्विंटन डी कॉक, फॅफ डू प्लेसिस आणि एबी डी’व्हिलियर्स यांनी शतके झळकावली. भारताचा मध्यमगती गोलंदाज भुवनेश्वर कुमारने १० षटकांमध्ये १०६ धावा दिल्या, तर सुरेश रैनाने या सामन्यात आपल्या एकदिवसीय कारकीर्दीतील शंभरावा झेल पकडला.
– प्रसाद मुंबईकर