संधी ही चोरपावलाने येते, परंतु निसटून जाते तेव्हाच तिचे अनन्यसाधारण महत्त्व पटते. सकाळच्या सत्रात जेव्हा न्यूझीलंडचे तीन फलंदाज धावफलकावर तिशी झळकेपर्यंत तंबूत परतले होते, तेव्हा भारताच्या गोलंदाजांकडे वर्चस्व प्राप्त करण्याची संधी चालून आली होती. परंतु तिचे सोने करण्यात भारतीय गोलंदाज कमी पडले. हा ढासळणारा बुरूज सावरत ब्रेन्डन मॅक्क्युलम आणि केन विल्यम्सन पहाडासारखे मैदानावर उभे राहिले. ‘रब ने बना दी जोडी..’ची अनुभूती न्यूझीलंड संघाला तिथेच आली. या दोघांच्या झुंजार शतकांमुळे आणि महत्त्वपूर्ण भागीदारीमुळे पहिल्या कसोटी सामन्याच्या पहिल्या दिवशी न्यूझीलंडच्या संघाने दमदार मजल मारली.ईडन पार्कवर प्रारंभीच्या हाराकिरीनंतर न्यूझीलंडने आपल्या समर्थ फलंदाजीचा प्रत्यय घडवला आणि दिवसअखेर ४ बाद ३२९ धावा केल्या. खेळ थांबला तेव्हा कर्णधार मॅक्क्युलम (१४३ खेळत आहे) आणि कोरे अँडरसन (४२ खेळत आहे) मैदानावर होते.मॅक्क्युलमने कर्णधारपदाला साजेसा खेळ करीत आपल्या कसोटी कारकीर्दीतील आठवे तर भारताविरुद्ध तिसरे शतक झळकावले. रवींद्र जडेजाच्या गोलंदाजीवर उत्तुंग षटकार ठोकून मॅक्क्युलमने आपले शतक साजरे केले. त्याला तोलामोलाची साथ देणाऱ्या विल्यम्सनने (११३) आपले पाचवे कसोटी शतक १० चौकार आणि दोन षटकारांनिशी साकारले.दडपणाखाली खेळताना भारताच्या गोलंदाजीत सातत्याचा अभाव तीव्रतेने जाणवला. याचप्रमाणे क्षेत्ररक्षकांनी तब्बल चार झेल सोडले. हेच सारे न्यूझीलंडच्या पथ्यावर पडले. त्यामुळेच ३ बाद ३० अशी पडझड झाल्यानंतर विल्यम्सन आणि मॅक्क्युलम यांनी चौथ्या विकेटसाठी २२१ धावांची अनमोल भागीदारी रचली.त्याआधी, वेगवान गोलंदाजांना अनुकूल ईडन पार्कच्या खेळपट्टीवर भारताने नाणेफेक जिंकल्यावर अपेक्षेप्रमाणे प्रथम गोलंदाजी स्वीकारली. उपाहारापूर्वीचे पहिले सत्र न्यूझीलंडसाठी प्रतिकूल आणि भारतासाठी अनुकूल ठरले. सलामीवीर पीटर फुल्टन (६) आणि हमिश रुदरफोर्ड (६) पाठोपाठ फॉर्मात असलेल्या रॉस टेलरने (३) घोर निराशा केली. पहिल्या सत्राअखेरीस न्यूझीलंडच्या धावफलकावर जेमतेम ५४ धावा जमा होत्या. परंतु दुसऱ्या सत्रात विल्यम्सन आणि मॅक्क्युलम यांनी २७ षटकांत १२५ धावांची भागीदारी करीत हे सत्र न्यूझीलंडसाठी सकारात्मक ठरवले.नुकत्याच झालेल्या एकदिवसीय मालिकेत ४-० असे वर्चस्व संपादन करणाऱ्या न्यूझीलंडने पहिल्या कसोटीतसुद्धा तितक्याच ताकदीने आपल्या खेळाचे प्रदर्शन केले आहे. सीमारेषा जवळ असल्यामुळे न्यूझीलंडच्या फलंदाजांनी मग आरामात धावा काढल्या, तर भारतीय गोलंदाज बळी मिळवण्यासाठी झगडताना दिसले. इशांत शर्मा (६२ धावांत २ बळी) सर्वात यशस्वी ठरला. त्याने आपल्या ५४व्या कसोटीत दीडशे बळींचा टप्पाही गाठला. झहीर खानने ९८ धावांत २ बळी घेतले, तर मोहम्मद शमीची झोळी रिकामी राहिली. टणक आणि उसळणाऱ्या खेळपट्टीवर रवींद्र जडेजा (८१ धावांत ० बळी) प्रभावहीन ठरला. याचप्रमाणे धोनीने रोहित शर्मा आणि विराट कोहलीलाही आजमावून पाहिले.धावफलकन्यूझीलंड (पहिला डाव) : पीटर फुल्टन पायचीत गो. खान १३, हमिश रुदरफोर्ड झे. रहाणे गो. इशांत ६, केन विल्यम्सन झे. धोनी गो. खान ११३, रॉस टेलर झे. जडेजा गो. इशांत ३, ब्रेन्डन मॅक्क्युलम खेळत आहे १४३, कोरे अँडरसन खेळत आहे ४२, अवांतर (बाइज १, लेगबाइज ५, वाइड ३) ९, एकूण ९० षटकांत ४ बाद ३२९बाद क्रम : १-१९, २-२३, ३-३०, ४-२५१गोलंदाजी : मोहम्मद शमी २२-६-६६-०, झहीर खान २३-२-९८-२, इशांत शर्मा २१-४-६२-२, रवींद्र जडेजा २०-१-८१-०, विराट कोहली १-०-४-०, रोहित शर्मा ३-०-१२-०अब तक १५१!ऑकलंड : वेगवान गोलंदाज इशांत शर्माने सलामीवीर हमिश रुदरफोर्डला पहिल्या कसोटीच्या पहिल्या दिवशी तंबूची वाट दाखवून आपल्या खात्यावर १५०वा बळी नोंदवला आहे. दीडशे बळींचा टप्पा गाठणारा तो भारताचा ११वा गोलंदाज ठरला आहे. इशांतने आपल्या कसोटी कारकीर्दीतील ५४व्या कसोटीत हा टप्पा गाठला आहे. त्यानंतर रॉस टेलरला बाद करून त्याने १५१व्या बळीची नोंद केली.कसोटी क्रिकेटमध्ये १५० बळी मिळवणे, हे माझ्यासाठी मोठे यश आहे. माझ्या मते, मी चांगली गोलंदाजी केली. दक्षिण आफ्रिकेतही माझ्याकडून चांगली गोलंदाजी झाली होती. आम्ही दिवसभर चांगल्या टप्प्यांवर चेंडू टाकले. पण यावेळी फलंदाजांना श्रेय द्यायला हवे, त्यांनी चांगली फलंदाजी केली. दिवस पुढे जातील, तशी खेळपट्टी अधिकाधिक अनुकूल होत जाईल.इशांत शर्मा.उपाहारानंतर फलंदाजी करणे अधिक सोपे होत गेले. भारतीय गोलंदाजांनी चांगली कामगिरी करत वरचढ होण्याचा प्रयत्न केला. पण माझी आणि ब्रेन्डनची चांगली भागीदारी झाली. ब्रेन्डनकडून चांगली फलंदाजी पाहायला मिळाली. शतक झळकावणे हे नेहमीच आनंददायी असते. परंतु माझ्या धावा संघासाठी उपयोगी पडतील, हे जास्त आनंददायी आहे.- केन विल्यम्सन.* कसोटीचे अग्निदिव्य!
