Harmanpreet Kaur: “नवी मुंबई म्हणजे घरचं मैदान”, पहिला वर्ल्डकप जिंकल्यानंतर हरमनप्रीत झाली भावूक! ऐतिहासिक विजयानंतर कर्णधार काय म्हणाली?

चांगला खेळ केल्यानंतर कौतुक होतं पण, गमावल्यानंतर खेळाडूंवर टीका होते. यावर आपली प्रतिक्रिया देताना हरमनप्रीत कौर म्हणाली, “टीका होणं हा आपल्या आयुष्याचा एक महत्वाचा भाग आहे. आयुष्यात समतोल राखण्यासाठी टीका होणं खूप आवश्यक आहे. जर सगळं काही ठीक सुरू असेल तर ओव्हर कॉन्फिडन्स वाढतो.”असं हरमनप्रीत कौर म्हणाली.

नवी मुंबईत वर्ल्डकप आला आणि आम्हाला वाटलं आता हीच ती वेळ असं म्हणताना हरमनप्रीत कौर म्हणाली, “जेव्हा आम्हाला कळालं की, आमचे सामने डी. वाय. पाटील स्टेडियममध्ये होणार आहेत, हे ऐकताच आम्हाला आनंद झाला. कारण आम्ही इथे नेहमीच चांगला खेळ केला आहे. आम्ही म्हणालो, आम्ही आता घरी आलो आहोत, आता नवी सुरुवात करू.

भारताने गेल्या काही वर्षांत सेमीफायनल आणि फायनलमध्येही प्रवेश केला होता, पण एकदाही ट्रॉफी उंचावता आली नव्हती. याबाबत बोलताना हरमनप्रीत कौर म्हणाली, “आम्ही गेल्या काही वर्षांपासून चांगलं क्रिकेट खेळत आहोत. पण आम्हाला एक मोठी स्पर्धा जिंकायची होती. आम्ही या क्षणाची आतुरतेने वाट पाहत होतो. आज आम्हाला तो क्षण जगण्याची संधी मिळाली आहे. हे शब्दात कसं मांडू हेच कळत नाही. पण मला माझ्या संघावर खूप अभिमान आहे.” हा भारतीय महिला क्रिकेट संघाचा पहिलाच वर्ल्डकप विजय ठरला. विजयानंतर भारतीय खेळाडूंनी रात्रभर विजयाचा जल्लोष केला.